तामिळनाडू आणि पुदुचेरीतील मनोज शिवकुमार व श्रीसरन तिरुज्ञानसंबंधम यांचा मृत्यू; अपघाताच्या कारणाचा स्थानिक प्रशासनाकडून तपास
कॅनडा : कॅनडामध्ये विमान प्रशिक्षण घेत असताना झालेल्या विमान अपघातात तामिळनाडू आणि पुदुचेरी येथील दोन भारतीय विद्यार्थ्यांचा मृत्यू झाला आहे. मनोज शिवकुमार आणि श्रीसरन तिरुज्ञानसंबंधम अशी मृत विद्यार्थ्यांची नावे आहेत. या घटनेची माहिती व्हँकुव्हरमधील भारतीय वाणिज्य दूतावासाने दिली असून, त्यांच्या कुटुंबीयांप्रति शोक व्यक्त केला आहे.
या दुर्घटनेनंतर भारतीय वाणिज्य दूतावासाने सोशल मीडियावर पोस्ट करत दोन्ही विद्यार्थ्यांच्या निधनाबद्दल दुःख व्यक्त केले. तसेच मृत विद्यार्थ्यांचे पार्थिव भारतातील त्यांच्या मूळ राज्यांमध्ये पोहोचविण्यासाठी कुटुंबीयांना आवश्यक ती सर्व मदत देण्याची तयारी दर्शवली आहे.
वाणिज्य दूतावासाच्या माहितीनुसार, स्थानिक प्रशासन आणि मृत विद्यार्थ्यांच्या कुटुंबीयांशी सातत्याने संपर्क ठेवण्यात आला आहे. पार्थिव भारतात परत आणण्याच्या प्रक्रियेत कुटुंबीयांना दूतावासीय तसेच आवश्यक ते सहकार्य केले जात आहे.
दरम्यान, हा विमान अपघात नेमका कोणत्या कारणामुळे झाला, याबाबत अद्याप अधिकृत माहिती समोर आलेली नाही. स्थानिक प्रशासनाकडून दुर्घटनेच्या कारणांचा तपास सुरू आहे.
सस्कॅचेवानमध्ये सेसना १७२ विमान कोसळले
कॅनेडियन मीडिया सीबीसीने शनिवारी सस्कॅचेवानमध्ये अशाच प्रकारच्या विमान अपघाताची माहिती दिली होती. मात्र, हा अपघात भारतीय विद्यार्थ्यांच्या मृत्यूच्या घटनेशी संबंधित आहे की नाही, याची पडताळणी होऊ शकलेली नाही.
सीबीसीच्या वृत्तानुसार, हार्वेस एअरचे सेसना १७२ विमान स्थानिक वेळेनुसार शुक्रवारी सकाळी सस्कॅचेवानमधील किस्बे परिसरात कोसळले. या दुर्घटनेत विमानातील दोन्ही व्यक्तींचा मृत्यू झाला. विमानात दोन परवानाधारक पायलट होते.
हे दोन्ही पायलट रात्रीच्या वेळी रेजिना येथून सस्कॅचेवानमधील कार्लाइलमार्गे मॅनिटोबातील स्टाइनबॅककडे विमानाने जात होते. हार्वेस एअरचे अध्यक्ष ॲडम पेनर यांनी दिलेल्या निवेदनानुसार, व्यावसायिक वैमानिक परवान्यासाठी आवश्यक असलेले उड्डाणाचे तास पूर्ण करण्याच्या उद्देशाने दोन्ही पायलटांनी हे विमान भाड्याने घेतले होते.
सकाळी सुमारे साडेदहा वाजेपर्यंत विमान नियोजित ठिकाणी पोहोचले नसल्याने कॅनडाच्या वाहतूक सुरक्षा मंडळाला याची माहिती देण्यात आली. त्यानंतर विमानाचा शोध घेण्यासाठी शोध आणि बचाव मोहीम सुरू करण्यात आली.
शोध आणि बचाव पथकाला सायंकाळी सुमारे ६ वाजता विमानाचे अवशेष आढळले. घटनास्थळी दोन्ही व्यक्तींचे मृतदेहही सापडले.
