अल्प व अनियमित पावसामुळे खरीप पिकांचे मोठ्या प्रमाणात नुकसान
शेतकरी संकटात; तातडीने मदत व उपाययोजना करण्याची मागणी
मानोरा (Manora Taluka Dry Drought) : कारंजा - मानोरा विधानसभा मतदार संघातील मानोरा तालुक्यात यंदा पावसाचे प्रमाण अत्यल्प व अनियमित राहिल्यामुळे शेतकरी मोठ्या संकटात सापडला आहे. पावसाअभावी खरीप पिकांचे मोठ्या प्रमाणात नुकसान झाले असून शेतकऱ्यांच्या हातात अपेक्षित उत्पादन येत नसल्याचे चित्र आहे. या पार्श्वभूमीवर मानोरा तालुक्यातील सर्व ६ महसूल मंडळामध्ये सरसकट कोरडा दुष्काळ जाहीर करून पिक विम्यासह आर्थिक मदत द्यावी, असे मागणीचे निवेदन दि. २४ सप्टेंबर रोजी मुख्यमंत्री देवेंद्र फडणवीस यांना कारण जाधव कारंजा दौऱ्यावर आले असताना भारतीय जनता पार्टीचे पोहरादेवी मंडळाचे तालुकाध्यक्ष गणेश जाधव तालुकाध्यक्ष तथा लोकनियुक्त सरपंच गणेश पुरुषोत्तम जाधव यांच्यासह पदाधिकाऱ्यांनी दिले आहे.
निवेदनात म्हटले आहे की, मानोरा तालुक्यातील सर्व ६ महसूल मंडळांमध्ये दुष्काळसदृश परिस्थिती निर्माण झाली आहे. पिकांचे नुकसान, पाण्याची टंचाई, जनावरांसाठी चारा व पाण्याची कमतरता यामुळे शेतकरी व ग्रामीण भागातील नागरिक हतबल झाले आहे. त्यामुळे मानोरा तालुक्यातील सर्व महसूल मंडळात तातडीने दुष्काळ जाहीर करून पात्र शेतकऱ्यांना शासनाच्या नियमानुसार पीक नुकसान भरपाई व दुष्काळी अनुदान, पीक कर्जाबाबत सवलती, वीज बिलात सवलत, जनावरांसाठी चारा-पाण्याची व्यवस्था तसेच पिण्याच्या पाण्याची टंचाई दूर करण्यासाठी तातडीने व्यवस्था करण्यात यावी.
तसेच शेतकऱ्यांच्या गंभीर परिस्थितीचा सहानुभूतीपूर्वक विचार करून मानोरा तालुक्यातील सर्व ६ महसूल मंडळांमध्ये सरसकट कोरडा दुष्काळ जाहीर करून तातडीने आवश्यक मदत व उपाययोजना करण्यात याव्यात, असे निवेदन दिले आहे. निवेदन देतेवेळी मानोरा मंडळाचे तालुकाध्यक्ष अरविंद इंगोले, सुरेशराव गावंडे, माजी जिल्हा परिषद सदस्य उमेश ठाकरे, माजी पंचायत समिती सदस्य अभिषेक चव्हाण, पोहरादेवी मंडळाचे सरचिटणीस महेंद्र राठोड, सामील राठोड आदीसह भाजपा पदाधिकारी व कार्यकर्त्यांची उपस्थिती होती.
