५८ पोलिसांवर दंडात्मक कारवाई; सेवा पुस्तिकेतही होणार नोंद!
लातूर : लातूर जिल्ह्यात आतापर्यंत ५८ पोलीस अधिकारी व अंमलदारांवर विनाहेल्मेट दुचाकी चालविल्याबद्दल दंडात्मक कारवाई करण्यात आली आहे. विशेष म्हणजे, संबंधितांवर केवळ दंडात्मक कारवाई करून विषय संपविण्यात आलेला नसून, सदर कारवाईची नोंद त्यांच्या सेवा पुस्तिकेत घेण्याचे निर्देश देण्यात आले आहेत. दरम्यान, पोलिसांनी दिलेल्या प्रसिद्धी पत्रकात कोणत्या पोलीस ठाण्याअंतर्गत किती पोलीस अधिकारी व कर्मचाऱ्यांवर कारवाई झाली, याचा तपशील देण्यात आलेला नाही.
लातूर जिल्ह्यातील सर्व २३ पोलीस ठाण्यांच्या प्रभारी अधिकाऱ्यांना पोलीस अधीक्षक श्री. अमोल तांबे यांनी स्पष्ट निर्देश दिले आहेत की, पोलीस ठाण्यात दुचाकीवर येणाऱ्या सर्व अधिकारी व अंमलदारांनी हेल्मेट परिधान करूनच कर्तव्यस्थळी यावे. विनाहेल्मेट दुचाकीवर पोलीस ठाण्यात येणाऱ्या अधिकारी किंवा अंमलदारावर दंडात्मक कारवाई करण्यात यावी, तसेच त्याची सेवा पुस्तिकेत नोंद घेण्यात यावी, असे निर्देश देण्यात आले आहेत.
“कायद्याची अंमलबजावणी करणारे आपण आहोत. त्यामुळे कायद्याचे पालन करण्याची सुरुवात स्वतःपासूनच झाली पाहिजे,” ही भूमिका पोलीस अधीक्षक श्री. अमोल तांबे यांनी सुरुवातीपासूनच घेतली आहे. त्यामुळे हेल्मेट सक्तीच्या अंमलबजावणीत लातूर पोलीस दल स्वतः उदाहरण निर्माण करत असल्याचे दिसून येत आहे.
१ सप्टेंबरपासून हेल्मेट सक्तीची अंमलबजावणी
लातूर जिल्ह्यात दि. १ सप्टेंबर २०२६ पासून हेल्मेट सक्तीची अंमलबजावणी करण्यात येणार आहे. नागरिकांची गैरसोय टाळण्यासाठी तसेच हेल्मेट वापराबाबत जनजागृती निर्माण करण्यासाठी टप्प्याटप्प्याने अंमलबजावणी करण्यात येत आहे.
हेल्मेट वापरण्यासाठी मोठा खर्च किंवा विशेष प्रयत्न करण्याची आवश्यकता नाही. एक जबाबदार नागरिक म्हणून दुचाकी चालविताना हेल्मेट परिधान करण्याची सवय अंगीकारणे एवढीच अपेक्षा आहे.
दि. १ सप्टेंबर २०२६ पासून लातूर जिल्ह्यात “दुचाकी चालवताना हेल्मेट अनिवार्य” ही सुरक्षिततेची संस्कृती रुजविण्यासाठी प्रत्येक नागरिकाने स्वयंस्फूर्तीने सहभागी व्हावे.
