अहमदाबाद (Prajapati Family) : गुजरातमधील अहमदाबाद शहरातील चांदखेडा परिसरात घडलेल्या एका धक्कादायक घटनेमुळे खळबळ उडाली आहे. प्रजापती कुटुंबातील दोन लहान बहिणींचा संशयास्पद मृत्यू झाल्याने या प्रकरणाने गंभीर वळण घेतले आहे. सुरुवातीला डोशाच्या पिठामुळे विषबाधा झाल्याचा कुटुंबाचा दावा होता, मात्र पोलिस तपासात वेगळेच संकेत मिळत आहेत.
मिळालेल्या माहितीनुसार, तीन महिन्यांची राहा आणि चार वर्षांची मिश्री या दोन्ही चिमुरड्यांची उपचारादरम्यान मृत्यू झाला. कुटुंबातील इतर सदस्य – विमल प्रजापती आणि त्यांची पत्नी भावना – यांनाही प्रकृती बिघडल्याने रुग्णालयात दाखल करण्यात आले असून भावनांची प्रकृती गंभीर आहे.
या घटनेनंतर चौघांचे रक्तनमुने न्यायवैद्यक प्रयोगशाळेत तपासणीसाठी पाठवण्यात आले. प्राथमिक अहवालात सर्वांच्या नमुन्यांमध्ये झिंक आणि ॲल्युमिनियम फॉस्फाइडसारखी विषारी संयुगे आढळून आली आहेत. त्यामुळे अन्नातून विषबाधा झाल्याच्या सुरुवातीच्या दाव्यावर प्रश्नचिन्ह निर्माण झाले आहे.
विशेष म्हणजे, संबंधित कुटुंबाने ज्या डेअरीमधून डोशाचे पीठ खरेदी केले होते, त्या पिठामुळे विषबाधा झाली असती तर इतर ग्राहकांनाही त्रास झाला असता, असे पोलिसांचे म्हणणे आहे. मात्र अशा कोणत्याही तक्रारी समोर आलेल्या नाहीत. त्यामुळे तपासाची दिशा आता हेतूपुरस्सर विषप्रयोगाकडे वळत आहे.
दरम्यान, स्तनपानामुळे लहान बाळावर विषाचा परिणाम झाला का, तसेच कीटकनाशकांमध्ये वापरल्या जाणाऱ्या ॲल्युमिनियम फॉस्फाइडचा यात काही संबंध आहे का, याचाही तपास सुरू आहे. यासोबतच विमल प्रजापती डेअरीतून निघाल्यानंतर थेट घरी गेले की अन्यत्र थांबले, याचा शोध घेण्यासाठी परिसरातील सीसीटीव्ही फुटेज तपासले जात आहेत.
पोलिसांनी डेअरीमधून डोशाचे पीठ आणि इतर नमुने जप्त केले असून, आता अंतर्गत अवयवांच्या व्हिसेरा अहवालाची प्रतीक्षा आहे. हा अहवाल आल्यानंतरच मृत्यूचे नेमके कारण स्पष्ट होईल आणि पुढील कायदेशीर कारवाईचा मार्ग ठरेल, असे अधिकाऱ्यांनी सांगितले आहे.
