फॉरेन्सिक तपासात मोबाईलमधून १३२ प्रश्नांचे फोटो; त्यातील १११ प्रश्न NTAच्या मास्टर प्रश्नसंचाशी जुळल्याचे निष्पन्न
नवी दिल्ली : NEET पेपरफुटी प्रकरणाच्या तपासात केंद्रीय अन्वेषण विभागाने (CBI) आणखी एक महत्त्वाचा खुलासा केला आहे. या प्रकरणातील प्रमुख आरोपी पी. व्ही. कुलकर्णी यांच्याशी संबंधित शिवराज मोटेगावकर यांनी रसायनशास्त्राच्या प्रश्नपत्रिकेतील प्रश्न मिळवण्यासाठी तब्बल ५ लाख रुपये दिल्याचा आरोप तपासातून समोर आला आहे. या घडामोडीमुळे पेपरफुटी प्रकरणातील तपासाला नवे वळण मिळाले आहे.
महिनाभरापूर्वी उघडकीस आलेल्या NEET पेपरफुटी प्रकरणामुळे राज्यासह देशभरात मोठी राजकीय चर्चा रंगली होती. या पार्श्वभूमीवर केंद्रीय शिक्षणमंत्री धर्मेंद्र प्रधान यांच्या राजीनाम्याची मागणी करत सामाजिक कार्यकर्ते सोनम वांगचुक यांनी उपोषण सुरू केले असून, सलग १८ दिवस उपोषण केल्यामुळे त्यांची प्रकृती खालावल्याची माहिती समोर आली आहे.
CBIच्या तपासानुसार, शिवराज मोटेगावकर यांचा मुलगा पी. व्ही. कुलकर्णी यांच्या 'केमिस्ट्री ट्युटोरियल्स' या कोचिंग क्लासमध्ये शिकत होता. तपासात याच ठिकाणी प्रश्नपत्रिकेतील प्रश्न उपलब्ध करून देण्यात आल्याचे निष्पन्न झाले आहे. या प्रश्नांच्या बदल्यात मोटेगावकर यांनी ५ लाख रुपये दिल्याचा आरोप तपास यंत्रणेने केला आहे.
तपासादरम्यान CBIने मोटेगावकर यांचा मोबाईल जप्त करून त्याची फॉरेन्सिक तपासणी केली. या तपासात मोबाईलमध्ये एकूण ३६ छायाचित्रे आढळली, त्यापैकी ५ छायाचित्रे डुप्लिकेट असल्याचे स्पष्ट झाले. उर्वरित छायाचित्रांमध्ये हाताने लिहिलेले रसायनशास्त्र विषयाचे १३२ प्रश्न आढळले.
या प्रश्नांची NTAच्या मास्टर प्रश्नसंचाशी तुलना करण्यात आली असता, त्यापैकी १११ प्रश्न तंतोतंत जुळत असल्याचे CBIच्या तपासातून स्पष्ट झाले. तसेच मोबाईलच्या मेटाडेटाच्या विश्लेषणातून हे फोटो ३ मे रोजी काढण्यात आल्याचे समोर आले. म्हणजेच NEET परीक्षा होण्याच्या सुमारे दहा दिवस आधीच संबंधित प्रश्न आरोपींपर्यंत पोहोचल्याचे तपासातून स्पष्ट झाले आहे.
CBIच्या म्हणण्यानुसार, हे प्रश्न स्वतः शिवराज मोटेगावकर यांनी हाताने लिहून घेतले होते. या व्यापक पेपरफुटी रॅकेटच्या तपासात CBIने आतापर्यंत पुणे, लातूर आणि इतर भागांतून १३ जणांना अटक केली असून, पुढील तपास सुरू आहे.
