जवळार्जुनच्या सभेत जय पवारांचा विरोधकांवर निशाणा; २१ जागांसाठी ११ ऑक्टोबरला मतदान, तिरंगी लढतीमुळे निवडणुकीची रंगत वाढली
श्री सोमेश्वर सहकारी साखर कारखान्याच्या पंचवार्षिक निवडणुकीचा प्रचार आता निर्णायक टप्प्यात पोहोचला आहे. निवडणुकीच्या पार्श्वभूमीवर सोमेश्वर परिसरातील राजकीय वातावरण तापले असून राष्ट्रवादी काँग्रेस आणि शिवसेना पुरस्कृत ‘सोमेश्वर विकासपुरुष अजितदादा पवार पॅनेल’च्या उमेदवारांसाठी जय पवार यांनी सोमवारी प्रचाराची धुरा हाती घेतली. पुरंदर तालुक्यातील जवळार्जुन येथे शेतकऱ्यांशी संवाद साधताना त्यांनी कारखान्याचे विद्यमान अध्यक्ष पुरुषोत्तम जगताप यांच्यावर थेट टीका केली.
जवळार्जुन येथील सभेत पॅनेलच्या उमेदवारांच्या निवडीवरून झालेल्या चर्चेचा संदर्भ देत जय पवार यांनी जगताप यांच्या भूमिकेवर प्रश्न उपस्थित केला. सर्वांनी एकत्र बसून एकच पॅनेल तयार करण्याचे ठरले होते. २८ तारखेला झालेल्या बैठकीत कारखान्याच्या निवडणुकीबाबत चर्चा सुरू असताना चेअरमन यांनी १६ जणांची नावे आपल्याला हवी असल्याचे सांगितले आणि इतर उमेदवार नको असल्याचे स्पष्ट केल्याचा दावा जय पवार यांनी केला.
या संदर्भात ‘वहिनीं’नी इतक्या व्यक्तींना प्राधान्य दिल्यानंतर इतर इच्छुक उमेदवारांना पॅनेलमध्ये कसे सामावून घ्यायचे, असा प्रश्न उपस्थित केल्याचेही जय पवार यांनी सांगितले. तसेच, अजित पवार असते तर अशा प्रकारची उमेदवारांची यादी त्यांच्यासमोर मांडली असती का, असा सवाल त्यांनी केला.
अजित पवार यांना बोलावण्यात आल्यानंतर ‘वहिनीं’ना साडेतीन ते चार तास प्रतीक्षा करावी लागल्याचा दावाही जय पवार यांनी सभेत केला. जर अजित पवार यांनी काही व्यक्ती पॅनेलमध्ये असाव्यात असे ठरवले असते, तर त्यांना विरोध केला असता का, असा थेट प्रश्न उपस्थित करत त्यांनी पुरुषोत्तम जगताप यांच्यावर निशाणा साधला.
‘दादांच्या मार्गदर्शनाखाली काम करताना जबाबदारीची जाणीव होती’
जय पवार यांनी आपल्या भाषणात अजित पवार यांच्या कार्यपद्धतीचा उल्लेख करत शेतकऱ्यांच्या हितासाठी सोमेश्वर कारखाना चालवण्याची भूमिका मांडली. शिवतारे बापूंशी चर्चा केल्यानंतर त्यांनी आपल्यासोबत असल्याचे सांगितल्याचा दावाही जय पवार यांनी केला.
अजित पवार अनेक वर्षे सर्वांना सोबत घेऊन काम करत होते, असे सांगताना जय पवार म्हणाले की, आपणही त्यांच्या मार्गदर्शनाखाली एका कारखान्याचे काम पाहत आहोत. कारखान्याच्या कामकाजाबाबत अजित पवार यांनी विचारणा केल्यास त्यांना योग्य उत्तर द्यावे लागत होते; अन्यथा त्यांच्या नाराजीला सामोरे जावे लागायचे, अशी आठवण त्यांनी सांगितली.
अजित पवार यांचा फोटो पाहिल्यावर भावनिक होत असल्याचे सांगत जय पवार यांनी पार्थ पवार आणि आपण वयाने आणखी मोठे असतो तर अधिक जोमाने काम करता आले असते, अशी भावनाही व्यक्त केली.
२१ जागांसाठी ११ ऑक्टोबरला मतदान
दरम्यान, श्री सोमेश्वर सहकारी साखर कारखान्याची २०२६ ची पंचवार्षिक निवडणूक २१ जागांसाठी होत आहे. या निवडणुकीसाठी ११ ऑक्टोबर २०२६ रोजी मतदान होणार आहे. निवडणुकीच्या रिंगणात तीन प्रमुख पॅनेल असल्याने सोमेश्वर कारखान्यातील राजकीय समीकरणांना विशेष महत्त्व प्राप्त झाले आहे.
सुनेत्रा पवार यांच्या नेतृत्वाखालील राष्ट्रवादी काँग्रेस पक्षाने उपमुख्यमंत्री एकनाथ शिंदे यांच्या नेतृत्वाखालील शिवसेनेसोबत युती केली आहे. या आघाडीच्या माध्यमातून ‘सोमेश्वर विकासपुरुष अजितदादा पवार पॅनेल’चे उमेदवार निवडणूक लढवत आहेत.
दुसरीकडे, शरद पवार यांच्या नेतृत्वाखालील राष्ट्रवादी काँग्रेस पक्ष (शरदचंद्र पवार) यांच्या माध्यमातून युगेंद्र पवार यांच्या मार्गदर्शनाखाली ‘शेतकरी विकास पॅनेल’ निवडणुकीच्या मैदानात उतरले आहे.
कारखान्याचे विद्यमान अध्यक्ष पुरुषोत्तम जगताप यांनीही स्वतंत्र पॅनेल उभे करत या निवडणुकीत बंडखोरीचे पाऊल उचलले आहे. त्यांच्या पॅनेलला भाजपची साथ मिळत आहे. त्यामुळे सोमेश्वर सहकारी साखर कारखान्याच्या निवडणुकीत तीन पॅनेलमध्ये थेट लढत होत असून, प्रचाराला वेग आल्याने निवडणुकीची रंगत आणखी वाढली आहे.
