रिया तालुकदार गोस्वामी हत्येप्रकरणी पती रामानुजन गोस्वामी मुख्य संशयित; पोलिसांकडून तपास सुरू
गुवाहाटी : आसामच्या गुवाहाटी शहरातील हाटीगाव-बशिष्ठापूर परिसरात २५ वर्षीय विवाहित महिलेच्या हत्येने खळबळ उडाली आहे. रिया तालुकदार गोस्वामी असे मृत महिलेचे नाव असून, तिचे शिर एका पॉलिथिनच्या पिशवीत ठेवून घरातील फ्रिजमध्ये सापडल्याची माहिती पोलिसांनी दिली आहे. या प्रकरणात तिचा पती रामानुजन गोस्वामी हा मुख्य आरोपी असल्याचे पोलिसांनी सांगितले आहे.
रिया आणि रामानुजन यांचा विवाह सुमारे सहा महिन्यांपूर्वी झाला होता. त्यानंतर दोघेही गुवाहाटीतील बशिष्ठापूर बायलेन परिसरातील फ्लॅटमध्ये राहत होते. प्राथमिक तपासानुसार, दोघांमध्ये सोमवारी जोरदार वाद झाला होता. त्यानंतर रात्री सुमारे ८ वाजता रामानुजन घराबाहेर पडल्याचे सांगितले जाते.
दरम्यान, शेजाऱ्यांना घरातून दुर्गंधी येत असल्याचे मंगळवारी लक्षात आले. गेल्या दोन दिवसांपासून हे दाम्पत्य दिसत नसल्याचेही त्यांनी पोलिसांना सांगितले. दोघांचे मोबाईल फोनही बंद असल्याने संशय वाढला. माहिती मिळताच पोलिसांचे पथक घटनास्थळी पोहोचले. घराला कुलूप असल्याने पोलिसांनी ते तोडून आत प्रवेश केला असता रियाचा मृतदेह आढळून आला.
तपासादरम्यान मृतदेहाचे शिर गायब असल्याचे पोलिसांच्या निदर्शनास आले. त्यानंतर घराची झडती घेतली असता रियाचे शिर काळ्या पॉलिथिनच्या पिशवीत गुंडाळून फ्रिजमध्ये ठेवलेले आढळले. तिच्या बोटांवरही धारदार शस्त्राने वार केल्याचे, तसेच काही बोटे कापण्यात आल्याचे प्राथमिक तपासात समोर आले आहे. घटनास्थळावरून पोलिसांनी एक शस्त्रही जप्त केले असून, ते हत्येत वापरले गेले असावे असा संशय आहे.
पोलिसांच्या प्राथमिक अंदाजानुसार, मृत्यूच्या घटनेनंतर सुमारे २४ ते ४८ तासांनी मृतदेह आढळून आला. रियाच्या शरीराची कुजण्याची प्रक्रिया सुरू झाली होती. तिचा मृतदेह आणि शिर शवविच्छेदनासाठी गुवाहाटी मेडिकल कॉलेज अँड हॉस्पिटल (GMCH) येथे पाठवण्यात आले आहे. शवविच्छेदनाच्या अहवालातून मृत्यूचे नेमके कारण आणि घटनाक्रम स्पष्ट होण्यास मदत होणार आहे.
गुवाहाटी पोलिस आयुक्तालयाचे ADCP (East) अनुराग शर्मा यांनी या प्रकरणाची माहिती देताना रामानुजन गोस्वामी हा मुख्य आरोपी असल्याचे सांगितले. रामानुजनने पोलिसांसमोर आत्मसमर्पण करून गुन्ह्याची कबुली दिल्याचे अधिकाऱ्यांनी स्पष्ट केले आहे. मात्र त्याच्या जबाबाची घटनास्थळी मिळालेल्या पुराव्यांशी पडताळणी केली जात आहे.
रिया ही नूनमती येथील रहिवासी होती. ती फॅन्सी बाजारातील एसी मार्केट परिसरातील एका बुटीकमध्ये काम करत असल्याची माहिती आहे. तिचे आई-वडील नसून तिच्या पश्चात एक भाऊ आहे. हत्येमागील नेमके कारण अद्याप स्पष्ट झालेले नाही.
पोलिसांकडून रामानुजनची चौकशी सुरू असून, वादानंतर नेमके काय घडले, हत्या कधी आणि कशा प्रकारे करण्यात आली तसेच या प्रकरणात अन्य कोणाचा सहभाग आहे का, याचा तपास केला जात आहे. आरोपीने आत्मसमर्पण करण्यामागील परिस्थितीचाही तपास करण्यात येत आहे. प्रकरणातील पुढील माहिती पोलिसांच्या तपासानंतर समोर येणार आहे.
