उपनगराध्यक्षा वैशाली खेडेकर यांची पोलिसांकडे मागणी
चिखली : शहरातील शाळा, महाविद्यालये तसेच ट्युशन परिसरात दुचाकीवरून मोकाट फिरणाऱ्या आणि मुलींना विनाकारण त्रास देणाऱ्या टवाळखोर मुलांचा तात्काळ बंदोबस्त करावा, अशी मागणी चिखली नगर परिषदेच्या उपनगराध्यक्षा सौ. वैशाली कपिल खेडेकर यांनी ठाणेदार, पोलीस स्टेशन चिखली यांच्याकडे निवेदनाद्वारे केली आहे.
दिलेल्या निवेदनात नमूद केले आहे की, चिखली शहरातील शाळा व महाविद्यालयीन परिसर तसेच ट्युशन क्लासच्या भागात अनेक टवाळखोर मुले दुचाकीवरून फिरताना दिसतात. या मुलांकडून मुलींना नाहक त्रास दिला जात असल्यामुळे त्यांच्या सुरक्षेचा प्रश्न गंभीर बनला आहे.
या समस्येवर त्वरित तोडगा काढण्यासाठी शाळा व महाविद्यालये भरण्याच्या आणि सुटण्याच्या वेळेत पोलीस गस्त किंवा बंदोबस्त तैनात करण्यात यावा. तसेच सायंकाळी ५ वाजेच्या सुमारास ट्युशन क्लास परिसरातही नियमित पेट्रोलिंग सुरू करावी, जेणेकरून अशा टवाळखोर मुलांवर आळा बसेल, अशी विनंती उपनगराध्यक्षा वैशाली खेडेकर यांनी केली आहे.
२७ ऑगस्ट २०२६ रोजी दिलेल्या निवेदनातून पोलिसांनी या प्रकरणी तात्काळ कारवाई करावी, अशी मागणी करण्यात आली आहे.
