अकोला (Vehicle Damage) : शहरात काँग्रेसच्या एका नगरसेवकाच्या वाहनाची तोडफोड झाल्याची घटना समोर आली आहे. काही अज्ञात व्यक्तींनी कारच्या मागील काचा फोडून नुकसान केल्याची माहिती मिळाली आहे. ही घटना काँग्रेसचे स्वीकृत नगरसेवक आकाश कवडे यांच्या वाहनाबाबत घडली आहे. आकाश कवडे हे काँग्रेसचे स्वीकृत नगरसेवक, युवक काँग्रेस प्रदेशचे उपाध्यक्ष आणि अकोल्याचे युवक काँग्रेसचे जिल्हाध्यक्ष म्हणूनही कार्यरत आहेत.
डाबकी रोड पोलिस ठाण्याच्या हद्दीत आकाश कवडे यांचे वास्तव्य असून, ही घटना घडली त्यावेळी ते घरीच उपस्थित होते. दरम्यान, या तोडफोडीमागील संशयितांची ओळख अद्याप स्पष्ट झालेली नाही. या प्रकरणाची नोंद पोलिसांत करण्यात आली असून पुढील तपास सुरू आहे.
घरासमोर उभी असलेली कार अज्ञातांकडून नुकसान करण्यात आल्याची माहिती मिळताच काँग्रेस कार्यकर्त्यांनी मोठ्या संख्येने घटनास्थळी गर्दी केली. या प्रकारामुळे परिसरात तणावाचे वातावरण निर्माण झाले आहे.
या घटनेनंतर संबंधित आरोपींचा शोध घेऊन त्यांच्यावर तातडीने कठोर कारवाई करावी, अशी मागणी काँग्रेस पदाधिकारी आणि कार्यकर्त्यांकडून केली जात आहे.
