गोंदेगावातील घटनेने खळबळ; करण अनिल वाघला न्यायालयाकडून एक दिवसाची पोलीस कोठडी
छत्रपती संभाजीनगर : लग्नासाठी सातत्याने फोन करणे, घरापर्यंत जाऊन दबाव आणि धमक्या दिल्याचा आरोप असलेल्या तरुणाच्या त्रासाला कंटाळून १९ वर्षीय तरुणीने आत्महत्या केल्याची घटना सोयगाव तालुक्यातील गोंदेगाव येथे घडली. या प्रकरणी पोलिसांनी तपासाला वेग देत गुन्हा दाखल झाल्यानंतर अवघ्या १० तासांत निंभोरा येथील करण अनिल वाघ याला अटक केली आहे. न्यायालयाने त्याला एक दिवसाची पोलीस कोठडी सुनावली आहे.
मिळालेल्या माहितीनुसार, निंभोरा (ता. सोयगाव) येथील करण अनिल वाघ हा गेल्या काही दिवसांपासून संबंधित तरुणीला फोन करून लग्नासाठी आग्रह करत होता. फोनवरील संपर्कापुरता हा प्रकार मर्यादित राहिला नाही. तो तरुणीच्या घरीही जात असल्याचे आणि लग्नासाठी तिच्यावर दबाव टाकत धमकावत असल्याचे फिर्यादीत नमूद करण्यात आले आहे.
या सततच्या त्रासामुळे तरुणी मानसिकदृष्ट्या अस्वस्थ आणि भयभीत झाली होती. करण वाघ याच्याकडून होत असलेल्या धमक्या व छळाला कंटाळून बुधवारी रात्री तिने गोंदेगाव येथील राहत्या घरी गळफास घेऊन आत्महत्या केली. १९ वर्षांच्या तरुणीने टोकाचे पाऊल उचलल्याने परिसरात हळहळ व्यक्त होत आहे.
घटनेची माहिती मिळताच सोयगाव पोलीस ठाण्याचे पथक घटनास्थळी दाखल झाले. मृत तरुणीच्या मामाने पोलिसांत फिर्याद दाखल केली. त्यानुसार करण अनिल वाघ याच्याविरुद्ध गुन्हा दाखल करण्यात आला.
प्रकरणाचे गांभीर्य लक्षात घेऊन पोलिसांनी तातडीने तपास सुरू केला. गुन्हा दाखल झाल्यानंतर अवघ्या दहा तासांत गुरुवारी रात्री निंभोरा येथून करण वाघ याला ताब्यात घेऊन अटक करण्यात आली.
दरम्यान, शुक्रवारी पोलिसांनी आरोपीला न्यायालयात हजर केले. न्यायालयाने करण वाघ याला एक दिवसाची पोलीस कोठडी सुनावली. तरुणीला नेमक्या कोणत्या प्रकारे त्रास दिला गेला, धमक्यांचे स्वरूप काय होते आणि या प्रकरणाशी संबंधित अन्य काही बाबी आहेत का, याचा तपास सोयगाव पोलीस करत आहेत.
