चेंबूरच्या 11 नंबर रोडवरील दुर्घटनेनंतर BMC, अग्निशमन दल आणि पोलिसांचे युद्धपातळीवर बचावकार्य; जेसीबीच्या सहाय्याने झाड हटवण्याचे काम सुरू
मुंबई (Tree Collapse) : मुंबई आणि उपनगरात सुरू असलेल्या मुसळधार पावसामुळे जनजीवन विस्कळीत झाले असतानाच चेंबूर परिसरातून एक गंभीर दुर्घटना समोर आली आहे. चेंबूर येथील 11 नंबर रोडवर धावत्या शाळेच्या बसवर अचानक एक मोठे झाड कोसळल्याने बसमधील विद्यार्थ्यांमध्ये एकच गोंधळ उडाला. या अपघातात 10 शाळकरी मुले गंभीर जखमी झाली असून, एक विद्यार्थी अद्याप बसमध्ये अडकल्याची प्राथमिक माहिती समोर आली आहे.
सतत सुरू असलेल्या पावसामुळे शहरात विविध ठिकाणी झाडे कोसळण्याच्या घटना घडत असताना ही दुर्घटना घडली. झाड थेट बसवर कोसळल्याने बसचा वरचा भाग मोठ्या प्रमाणात नुकसानग्रस्त झाला. अपघाताच्या वेळी बसमध्ये अनेक विद्यार्थी प्रवास करत होते.
घटनेनंतर स्थानिक नागरिकांनी तातडीने मदतकार्य सुरू केले. त्यांच्या मदतीने 10 जखमी विद्यार्थ्यांना बसमधून बाहेर काढण्यात आले. मात्र, एक शाळकरी मुलगा अद्याप बसमध्ये अडकल्याची माहिती मिळाल्यानंतर त्याला सुरक्षित बाहेर काढण्यासाठी बचाव पथकाकडून युद्धपातळीवर प्रयत्न सुरू आहेत.
घटनेची माहिती मिळताच बृहन्मुंबई महानगरपालिका (BMC), अग्निशमन दल आणि स्थानिक पोलीस तात्काळ घटनास्थळी दाखल झाले. परिस्थितीचे गांभीर्य लक्षात घेऊन प्रशासनाने तातडीने बचाव मोहीम सुरू केली आहे.
बसवर कोसळलेले झाड आकाराने मोठे आणि वजनदार असल्याने ते हटवण्यासाठी जेसीबी मशीन घटनास्थळी मागविण्यात आले आहे. तसेच अत्याधुनिक कटरच्या सहाय्याने झाडाचे फांद्या आणि खोड कापून बसवरील भार कमी करण्याचे काम सुरू आहे. बसमध्ये अडकलेल्या विद्यार्थ्याला सुरक्षित बाहेर काढण्याला सध्या प्राधान्य दिले जात आहे.
दरम्यान, जखमी झालेल्या सर्व 10 विद्यार्थ्यांना तातडीने रुग्णवाहिकांद्वारे जवळच्या पालिकेच्या रुग्णालयात दाखल करण्यात आले असून, त्यांच्यावर डॉक्टरांकडून उपचार सुरू आहेत. घटनास्थळी सध्या तणावपूर्ण वातावरण असून पोलीस आणि पालिका प्रशासन परिस्थितीवर बारकाईने लक्ष ठेवून आहे.
