मुंबईसह कोकण किनारपट्टीवर उष्ण आणि दमट हवामानाचा अंदाज; पुण्यात ऊन, ढगाळ वातावरण आणि गारवा, तर नागपुरात पारा ३५ अंशांवर
महाराष्ट्रातून मान्सूनच्या परतीचा वेग वाढत असतानाच राज्यात उन्हाचा चटका तीव्र होऊ लागला आहे. पावसाने काहीशी विश्रांती घेतल्यानंतर आता अनेक भागांत 'ऑक्टोबर हीट' जाणवू लागली आहे. आज, ५ ऑक्टोबर रोजी मुंबईसह संपूर्ण कोकण किनारपट्टीवर उष्णतेसोबत दमट हवामान राहण्याची शक्यता असून, हवामान विभागाने पालघर, ठाणे, मुंबई, रायगड आणि रत्नागिरी या जिल्ह्यांसाठी येलो अलर्ट जारी केला आहे.
राज्यातील काही ठिकाणी कमाल तापमान ३५ अंश सेल्सिअसच्या पुढे गेले आहे. कोकण पट्ट्यातील हवामान विशेषतः उष्ण आणि दमट राहण्याचा अंदाज आहे. पालघर, ठाणे, मुंबई, रायगड, सोलापूर आणि रत्नागिरी या भागांमध्ये उकाड्याचा प्रभाव जाणवणार आहे. राज्याच्या इतर भागांत प्रामुख्याने आकाश निरभ्र राहण्याची शक्यता असून, कडक ऊन आणि वाढत्या उष्णतेचा सामना करावा लागू शकतो.
कोकण किनारपट्टीवर उष्ण-दमट हवामान
मान्सूनचा परतीचा प्रवास सुरू झाल्याने कोकणातील वातावरणात मोठा बदल जाणवू लागला आहे. पावसाचा जोर कमी होताच उष्णता आणि दमटपणा वाढला आहे. त्यामुळे मुंबईसह कोकण किनारपट्टीवरील नागरिकांना उकाड्याचा त्रास होण्याची शक्यता आहे. हवामान विभागाने या पार्श्वभूमीवर संबंधित जिल्ह्यांना येलो अलर्ट दिला आहे.
पुण्यात ऊन, ढग आणि गारवा
पुणे शहर आणि जिल्ह्यात मागील तीन दिवसांपासून उन्हाची तीव्रता वाढल्याचे चित्र आहे. मात्र, पुणेकरांना सध्या दिवसभर एकसारखे हवामान अनुभवायला मिळत नाही. दुपारच्या वेळी कडक उन्हाचा सामना करावा लागत असून, काही वेळा ढगाळ वातावरण तयार होत आहे. त्यानंतर रात्री किंवा पहाटेच्या सुमारास वातावरणात गारवा जाणवत आहे. त्यामुळे पुण्यात एकाच वेळी ऊन, ढगाळ वातावरण आणि गारवा अशा तीन वेगवेगळ्या हवामानस्थितींचा अनुभव येत आहे.
नागपुरात पारा ३५ अंशांवर
विदर्भातही ऑक्टोबरच्या सुरुवातीलाच उन्हाची तीव्रता वाढली आहे. नागपुरात कमाल तापमान ३५ अंश सेल्सिअसपर्यंत पोहोचले आहे. दिवसा कडक ऊन, तर रात्रीच्या तापमानात घट अशी स्थिती सध्या नागपूरमध्ये पाहायला मिळत आहे. संपूर्ण ऑक्टोबर महिन्यात तापमान सरासरीपेक्षा अधिक राहण्याचा अंदाज व्यक्त करण्यात आला आहे.
या ठिकाणी उष्ण-दमट हवामानाचा येलो अलर्ट
पालघर, ठाणे, मुंबई, रायगड आणि रत्नागिरी या जिल्ह्यांमध्ये उष्ण व दमट हवामानाचा इशारा देण्यात आला आहे.
या शहरांमध्ये तापमानाचा चटका अधिक
राज्यातील काही ठिकाणी कमाल तापमानाने उच्चांक गाठला आहे. मालेगावमध्ये ३८.४ अंश सेल्सिअस, अमरावतीमध्ये ३८ अंश, डहाणूमध्ये ३७.९ अंश, रत्नागिरीमध्ये ३७.७ अंश, जळगावमध्ये ३७.५ अंश, सांताक्रूझमध्ये ३७.४ अंश आणि अकोल्यात ३७.१ अंश सेल्सिअस तापमानाची नोंद झाली आहे.
मान्सूनच्या परतीनंतर राज्यात आता उन्हाचा प्रभाव वाढत असून, ऑक्टोबर महिन्याच्या सुरुवातीलाच नागरिकांना उष्णतेचा सामना करावा लागत आहे. कोकणात दमट उकाडा, पुण्यात बदलते हवामान आणि विदर्भात वाढती उष्णता अशी स्थिती राज्यभर पाहायला मिळत आहे.
