मराठा आरक्षणाच्या विविध मागण्यांसाठी उपोषण करणारे मनोज जरांगे पाटील सध्या मुंबईच्या दिशेने मार्गस्थ झाले असून, त्यांच्या उपोषणाचा आज 19वा दिवस आहे. मंगळवारी अंतरवाली सराटीतून मुंबईकडे निघाल्यानंतर त्यांचा पहिला मुक्काम बीड जिल्ह्यातील पाटोदा येथे झाला. रात्री उशिरा पाटोद्यात पोहोचल्यानंतरही त्यांना पाहण्यासाठी मोठ्या संख्येने मराठा समाजबांधव जमले होते.
पाटोदा येथे पोहोचल्यानंतर मनोज जरांगे पाटील यांनी उपस्थितांशी संवाद साधला. रात्री उशिरापर्यंत त्यांची सभा सुरू होती. उपोषणामुळे प्रकृती खालावलेली असतानाही त्यांनी समाजबांधवांशी संवाद साधला. त्यानंतर ते व्यासपीठावरच विश्रांतीसाठी झोपले. त्यांच्या प्रकृतीबाबत वैद्यकीय पथकाकडून तपासणीही करण्यात आली.
दरम्यान, पहाटेच्या सुमारास मनोज जरांगे यांचे वडील रावसाहेब जरांगे पाटोद्यातील व्यासपीठावर पोहोचले. त्यावेळी मनोज जरांगे थकून झोपलेले होते. वडिलांनी काही वेळ आपल्या मुलाकडे एकटक पाहत बसून त्यांची अवस्था पाहिली. त्यानंतर ते खाली वाकले आणि मनोज जरांगेंच्या खांद्यावर डोकं टेकवलं. हा क्षण पाहून रावसाहेब जरांगे भावूक झाले आणि त्यांच्या डोळ्यांतून अश्रू वाहू लागले. काही वेळाने ते रडतच व्यासपीठावरून निघून गेले. हा प्रसंग पाहून उपस्थितांनाही भावुक झाल्याचे वृत्त आहे.
शेवटी बाप आहे साहेब तुमच्या सारख्यांना काय कळणार🥲 काटा रूतू नये म्हणून खांद्यावर घेणाऱ्या बापा समोर आमाचा देव अशा अवस्थेत पडलाय अरे काय म्हणत असंल काळीज बापाच🥲... #मराठा #बापमाणूस #मनोज_जरांगे_पाटील pic.twitter.com/cxpdtKvp78
— Dnyaneshwar Ghodke (@Dnyanes97334371) September 16, 2026
गेल्या 19 दिवसांपासून सुरू असलेल्या उपोषणाच्या पार्श्वभूमीवर मनोज जरांगे पाटील यांच्या प्रकृतीची स्थिती चिंताजनक असल्याचे वृत्त आहे. पाणी आणि सलाईन घेण्यास त्यांनी नकार दिल्याने त्यांच्या प्रकृतीवर परिणाम होत असल्याचे वैद्यकीय पथकाच्या माहितीतून समोर आले आहे. पाटोद्यात पोहोचल्यानंतरही त्यांची वैद्यकीय तपासणी करण्यात आली.
मुंबईतील आझाद मैदानावर उपोषण करण्यासाठी मनोज जरांगे पाटील यांनी परवानगी मागितली आहे. मात्र, मुंबई पोलिसांनी यापूर्वी त्यांचा अर्ज नाकारला असून त्यानंतरही त्यांनी मुंबईकडे जाण्याचा निर्णय कायम ठेवला आहे. 19 सप्टेंबर रोजी मुंबईत पोहोचण्याचे त्यांचे नियोजन असल्याचे वृत्त आहे.
दरम्यान, पहाटे वैद्यकीय तपासणीनंतरही मनोज जरांगे पाटील पाटोदा येथील मुक्कामाच्या ठिकाणी विश्रांती घेत होते. त्यांच्या प्रकृतीच्या पार्श्वभूमीवर पुढील प्रवासाबाबतही लक्ष लागले आहे.
