परभणी शहरातील वसमत रोडवरील घटना नवा मोंढा पोलिसात गुन्हा दाखल...!
परभणी (Nava Mondha Police) : कारमध्ये बसलेल्या व्यक्तीला बोलण्यात गुंतवून दुसर्‍याने गाडीच्या मागच्या सीटवर ठेवलेली रोकड असलेली बॅग घेऊन पळ काढला. यावेळी त्याला पाठलाग करत पकडण्यात आले. ही घटना सायंकाळी सव्वा सातच्या सुमारास वसमत रोडवर पोलीस अधीक्षक कार्यालयासमोर घडली. या प्रकरणी दोन जणांवर नवा मोंढा पोलीस ठाण्यात गुन्हा दाखल करण्यात आला आहे.
दिपक सुरेशराव डफुरे यांनी तक्रार दिली आहे. फिर्यादी हे मध्यवर्ती बँक पाथरी शाखेत कार्यरत आहेत. २ जुलै रोजी परभणीतील मुख्य कार्यालयात बैठक असल्याने फिर्यादी व त्यांच्या कारचे चालक दिपक उगले परभणी येथे आले. बैठकीला उशीर असल्याने व्यवस्थापकाचे चालक रोहित साळवे यांच्या सोबत मिळून पोलीस अधीक्षक कार्यालया शेजारी नाष्टा करण्यासाठी आले.
यावेळी त्यांनी कार रस्त्याच्या बाजूला उभी केली. फिर्यादी पुढील सीटवर बसलेले होते. तर चालक दिपक उगले, रोहित साळवे हे दोघे जण हॉटेल मध्ये नाष्टा आणण्यासाठी गेले. यावेळी एक इसम कार जवळ आला. त्याने खिडकीची काच वाजविली. फिर्यादीने काच खाली केली असता संबंधित व्यक्तीने बाहेर पैसे पडल्याचे सांगितले. तेंव्हा दरवाजा उघडून पाहत असताना दुसर्‍या एका व्यक्तीने कारच्या मागील सीटवर ठेवलेली पाच हजार रुपये रोकड असलेली पिशवी घेऊन पळ काढला.
यावेळी त्याला दिपक उगले, रोहित साळवे यांनी पाहिले. त्याचा पाठलाग केला असता संबंधिताने धक्काबुक्की केली. आरडाओरड करत संबंधिताला पकडण्यात आले. रोकडच्या बॅगसह त्याला पोलीस अधीक्षक कार्यालयासमोर गेटजवळ असलेल्या पोलिसांच्या मदतीने नवा मोंढा पोलीस ठाण्यात आणण्यात आले. संबंधिताची चौकशी केली असता त्याने आपले नाव गौतम रविचंद्रन रा. तामिळनाडू, असे सांगितले. तर त्याचा दुसरा साथीदार पळून जाण्यात यशस्वी झाला. या प्रकरणी संबंधितावर नवा मोंढा पोलीस ठाण्यात गुन्हा दाखल करण्यात आला आहे. तपास पोउपनि. डोंबे करत आहेत.
