मानवत शहरातील घटना; धमकी व शिवीगाळ केल्याचाही आरोप
मानवत (Molestation Case) : शहरातील एका १८ वर्षीय तरुणीचा विनयभंग केल्याप्रकरणी चार जणांविरुद्ध मानवत पोलीस ठाण्यात गुन्हा दाखल करण्यात आला आहे. ही घटना गुरुवारी रात्री घडल्याची माहिती पोलिसांनी दिली. पोलिसांकडून मिळालेल्या माहितीनुसार, गुरुवार, ११ जून रोजी रात्री साडेआठ ते पावणेनऊ वाजण्याच्या सुमारास फिर्यादी तरुणी तिच्या घरासमोर उभी असताना आरोपी सत्यम दहे याने तिच्या गालाला हात लावून मिठी मारत तिच्या विनयभंगाचा प्रयत्न केल्याचा आरोप आहे.
यावेळी जवाहरसिंग झिंजर, राहुल सोनटक्के आणि अजय दुधाने हे देखील घटनास्थळी आले. त्यांनी फिर्यादी तसेच तिच्या आई-वडिलांशी वाद घालत शिवीगाळ केली. तसेच सत्यम दहे याच्याशी वाद घातल्यास तलवारीने ठार मारण्याची धमकी दिल्याचे फिर्यादीत नमूद करण्यात आले आहे. या प्रकरणी पीडित तरुणीच्या तक्रारीवरून सत्यम दहे, जवाहरसिंग झिंजर, राहुल सोनटक्के आणि अजय दुधाने (सर्व रा. मानवत) यांच्याविरुद्ध मानवत पोलीस ठाण्यात विविध कलमान्वये गुन्हा दाखल करण्यात आला आहे.
घटनेचा पुढील तपास सहाय्यक पोलीस उपनिरीक्षक नलावडे करीत आहेत.
