हिंगोली (MLA Santosh Bangar) : हिंगोली शहराचे ग्रामदैवत असलेल्या श्री जलेश्वर मंदिर व तलाव परिसराच्या विकासासाठी जिल्हा वार्षिक योजना सन 2026-27 मधून निधी उपलब्ध करून देण्याची मागणी आमदार संतोष बांगर (MLA Santosh Bangar) यांनी केली आहे. याबाबत त्यांनी राज्याचे अन्न व औषध प्रशासन मंत्री तथा हिंगोली जिल्ह्याचे पालकमंत्री नरहरी झिरवाळ यांना निवेदन दिले आहे.
या निवेदनात आमदार बांगर (MLA Santosh Bangar) यांनी जलेश्वर मंदिर व तलाव परिसराच्या विकासासाठी एकूण सात कोटी रुपयांच्या कामांचा प्रस्ताव दिला आहे. यामध्ये नागरी दलितेत्तर योजनेतून चार कोटी आणि पर्यटन योजनेतून तीन कोटी रुपयांच्या कामांचा समावेश आहे.
नागरी दलितेत्तर अंतर्गत जलेश्वर तलावाभोवती पाथवेचे उर्वरित बांधकाम करण्यासाठी अडीच कोटी रुपये आणि तलाव परिसरात डेकोरेटिव्ह गार्डन पोल बसविण्यासाठी दीड कोटी रुपयांची मागणी करण्यात आली आहे. तर पर्यटन विकास योजनेतून हिंगोली नगर परिषदेच्या प्रभाग क्रमांक आठ मधील जलेश्वर मंदिर येथे तलावावरील आवक नाल्यावर पूल बांधकाम करण्यासाठी दोन कोटी रुपये आणि तलाव परिसरात बगीचा विकसित करण्यासाठी एक कोटी रुपये निधीची मागणी करण्यात आली आहे.
जलेश्वर तलाव हा हिंगोली शहराच्या वैभवात भर घालणारा असून त्याच्या सुशोभीकरणामुळे शहराच्या सौंदर्यात वाढ होणार आहे. तसेच पर्यटनाला चालना मिळून नागरिकांना एक उत्तम पर्यटन स्थळ उपलब्ध होणार आहे. त्यामुळे या कामांना प्राधान्याने निधी उपलब्ध करून द्यावा अशी विनंती आमदार बांगर (MLA Santosh Bangar) यांनी पालकमंत्र्यांकडे केली आहे.
