सीईओंना फटकारले, नोकर आहात, नोकरासारखं काम करा
हिंगोली (MLA Santosh Bangar) : जिल्हा परिषदेच्या आढावा बैठकीत १५ ऑगस्ट शनिवार रोजी आमदार संतोष बांगर (MLA Santosh Bangar) यांनी आरोग्य विभागासह संपूर्ण प्रशासनाचे चांगलेच वाभाडे काढले. जिल्हा नियोजन समितीच्या बैठकीत बांगर आणि मुख्य कार्यकारी अधिकारी विवेक गायकवाड यांच्यात चांगलीच खडाजंगी झाली.
यावेळी पालकमंत्री नरहरी झिरवाळ, खा. रामराव वडकुते, खा. नागेश पाटील आष्टीकर, आ. राजु नवघरे, आ. प्रज्ञा सातव, जिल्हाधिकारी राहुल गुप्ता, जिल्हा पोलीस श्रेणीक लोढा, जिल्हा परिषदेचे मुख्य कार्यकारी अधिकारी विवेक गायकवाड, अप्पर पोलीस अधीक्षक कमलेश मीना, अधिष्ठाता डॉ .चक्रधर मुंगल, जिल्हा आरोग्य अधिकारी डॉ कैलास शेळके, जिल्हा शल्यचिकित्सक डॉ नितीन तडस आदींची उपस्थिती होती.
बैठकीत संताप व्यक्त करताना आ. बांगर (MLA Santosh Bangar) म्हणाले, नोकर आहात तुम्ही, नोकरासारखं काम करा त्यांनी प्रशासनाच्या ढिसाळ कारभाराची चिरफाड करत रिक्त पदे, अधिकाऱ्यांची गैरहजेरी आणि कंत्राटी कर्मचाऱ्यांच्या मनमानी बदल्यांचा मुद्दा थेट मांडला.
कळमनुरी तालुक्यातील पोतरा प्राथमिक आरोग्य केंद्राचा मुद्दा उपस्थित करत बांगर म्हणाले, वारंवार सांगूनही त्या ठिकाणी तुम्ही माणसं दिली नाहीत. कशामुळे दिली नाहीत डॉक्टर, कर्मचारी अजूनही दिले नाहीत. जिल्हा परिषदेची सगळी बोंबाबोंब करून टाकली आहे.
जिल्हा परिषदेत कर्मचारी नसल्याने कामे कशी होणार असा सवाल करत ते म्हणाले, एकही जिल्हा परिषदेचा कर्मचारी जागेवर नाही. एकही ग्रामसेवक नाही. कोणताच अधिकारी नाही.कंत्राटी कर्मचाऱ्यांच्या बदल्यांचा मुद्दा काढत त्यांनी सीईओंना थेट जाब विचारला. कंत्राटी कर्मचाऱ्यांना इकडून तिकडे टाकले. तुम्हाला याचा अधिकार काय असा प्रश्न विचारत प्रशासन मनमानीपणे निर्णय घेत असल्याचा आरोप केला.
जिल्ह्यातील शिक्षकांना अतिरिक्त कामाचा बोजा दिला जात असल्याचे सांगत बांगर म्हणाले, जिल्ह्यातील शिक्षकांना देखील त्रास देण्याचे काम चालू आहे. त्यांनी काय करायचं हा तुमचा मनमानी कारभार सुरू आहे. एका तरी शिक्षकांनी सांगावे सीईओंचा कारभार बरोबर आहे का असा सवाल त्यांनी केला.
शेवटी सीईओंना जबाबदारीची आठवण करून देत बांगर म्हणाले,लोकांची सेवा आहे. आपल्या पद्धतीनं जगू नका. अधिकार मागू नका. लोकांसाठी काम करा. तुम्ही लोकांचे सेवक आहात लोकांच्या कामासाठी आले आहात त्यांची कामे करा,
गेल्या अनेक महिन्यांपासून हिंगोली जिल्हा परिषदेतील रिक्त पदे आणि मनमानी कारभाराचा प्रश्न गंभीर बनला आहे. आमदारांच्या या आक्रमक भूमिकेनंतर आता जिल्हा परिषद प्रशासन खडबडून जागे होते का, याकडे सर्वांचे लक्ष लागले आहे.
