देवणी (Illegal sand transportation) : तालुक्यातील इंद्राळ येथे विनापरवाना वाळू उत्खनन करून चोरटी वाहतूक करणाऱ्या ट्रॅक्टरवर देवणी पोलिसांनी कारवाई केली. या कारवाईत ट्रॅक्टर व ट्रॉलीतील अंदाजे एक ब्रास वाळूसह एकूण ७ लाख ५ हजार रुपयांचा मुद्देमाल जप्त करण्यात आला. याप्रकरणी एका व्यक्तीविरुद्ध गुन्हा दाखल करण्यात आला आहे.
पोलिसांनी दिलेल्या माहितीनुसार, २८ सप्टेंबर रोजी सकाळी साडेनऊच्या सुमारास इंद्राळ येथील आंबेडकर चौकाच्या दक्षिणेस सुमारे १२ किलोमीटर अंतरावरील ग्रामीण रस्त्यावर ही कारवाई करण्यात आली. जगदीश शंकरराव शिवपुरे (वय ५५, रा. विजयनगर, गौडगाव, ता. देवणी) हा शासनाचा कर बुडवून, कोणताही परवाना अथवा पास नसताना अवैधरीत्या वाळू उत्खनन करून तिची वाहतूक करत असल्याचे पोलिसांच्या निदर्शनास आले.
कारवाईदरम्यान JOHN DEERE कंपनीचा ट्रॅक्टर व ट्रॉली तसेच त्यातील अंदाजे एक ब्रास वाळू पोलिसांनी ताब्यात घेतली. जप्त मुद्देमालाची एकूण अंदाजे किंमत ७ लाख ५ हजार रुपये असल्याचे पोलिसांनी नमूद केले आहे.
या प्रकरणी पोलीस शिपाई मनोज रघुनाथ कांबळे यांनी दिलेल्या फिर्यादीवरून गुन्हा क्रमांक ३२७/२०२६ अन्वये भारतीय न्याय संहितेच्या कलम ३०३(२), पर्यावरण संरक्षण अधिनियम १९८६ मधील कलम १५ तसेच गौण खनिज अधिनियम १९५७ मधील कलम २१ अन्वये गुन्हा दाखल करण्यात आला आहे. गुन्हा दाखल करण्याची कार्यवाही पोलीस नाईक कटेवार यांनी केली. सपोनि अण्णाराव खोडेवाड यांच्या मार्गदर्शनाखाली पुढील तपास पोहेकॉ. लामतुरे करीत आहेत.
देवणी तालुक्यात अवैध वाळू उत्खनन व वाहतुकीवर पोलिसांकडून करण्यात आलेल्या या कारवाईमुळे गौण खनिजाची चोरी करणाऱ्यांमध्ये खळबळ उडाली आहे.
