इटोली शिवारात एसपी पथकाची कारवाई; जिंतूर पोलीस ठाण्यात चौघांविरुद्ध गुन्हा
परभणी (Illegal Sand Mining) : जिंतूर तालुक्यातील इटोली शिवारातील मसोबा पॉइंट परिसरातून अवैधरित्या वाळूची वाहतूक करणाऱ्या दोन टिप्परवर जिंतूर पोलिसांनी शनिवारी (२७ जून) रात्री कारवाई केली. या कारवाईत सुमारे १४ लाख १९ हजार रुपयांचा मुद्देमाल जप्त करण्यात आला असून, चार जणांविरुद्ध जिंतूर पोलीस ठाण्यात गुन्हा दाखल करण्यात आला आहे.
पोलिसांनी दिलेल्या माहितीनुसार, सहाय्यक पोलीस उपनिरीक्षक दत्तात्र्य गुंगाणे हे रात्री गस्त घालत असताना इटोली बसस्थानक येथे पोलीस अधीक्षकांच्या विशेष पथकातील अधिकारी व कर्मचाऱ्यांची भेट झाली. त्याचवेळी गुप्त बातमीदारामार्फत मसोबा पॉइंट परिसरातून दोन टिप्पर वाळू भरून येत असल्याची माहिती मिळाली.
या माहितीच्या आधारे दोन्ही पथकांनी संयुक्तपणे मसोबा मंदिरासमोर सापळा रचला. रात्री सुमारे ११.३५ वाजण्याच्या सुमारास दोन टिप्पर येताना दिसताच पोलिसांनी त्यांना थांबवून तपासणी केली. तपासणीदरम्यान दोन्ही टिप्परमध्ये वाळू आढळून आली. चालकांकडे वाळू वाहतुकीचा वैध परवाना मागितला असता तो नसल्याचे त्यांनी सांगितले.
एमएच-२२-एएन-५६८८ क्रमांकाच्या टिप्परचा चालक सोपान भगवान कुटे (वय २२, रा. कौवसडी, ता. जिंतूर) याने वाहन मालक नवनाथ शहाजी डोंबे (रा. बलसा, ता. जिंतूर) असल्याचे सांगितले. तसेच एमएच-२१-बीजी-४०१८ क्रमांकाच्या टिप्परचा चालक आश्रोबा गणपत गडदे (वय ४२, रा. निलज, ता. जिंतूर) याने वाहन मालक मनोहर पुंजाराम घुगे (रा. इटोली) असल्याची माहिती दिली. दोन्ही चालकांनी ही वाळू पूर्णा नदीपात्रातील मसोबा पॉइंट येथून आणल्याचे पोलिसांना सांगितले.
या कारवाईत दोन टिप्पर आणि त्यामधील तीन ब्रास वाळूसह एकूण सुमारे १४ लाख १९ हजार रुपयांचा मुद्देमाल जप्त करण्यात आला.
याप्रकरणी सहाय्यक पोलीस उपनिरीक्षक दत्तात्र्य गुंगाणे यांच्या फिर्यादीवरून चालक सोपान भगवान कुटे, आश्रोबा गणपत गडदे तसेच वाहन मालक नवनाथ शहाजी डोंबे आणि मनोहर पुंजाराम घुगे यांच्याविरुद्ध जिंतूर पोलीस ठाण्यात गुन्हा दाखल करण्यात आला आहे.
ही कारवाई पोलीस उपनिरीक्षक टर्वे, पोलीस हवालदार वाघमारे, चुडावकर, ताटीकोंडलवार, इरशाद तसेच विशेष पथकाने संयुक्तपणे केली. या प्रकरणाचा पुढील तपास जिंतूर पोलीस करीत आहेत.
