देशी दारूचे चौदा बॉक्स ताब्यात; पालम पोलिसांत गुन्हा
परभणी : परभणीतील पालम तालुक्यातील पेठपिंपळगाव ते पालम रोडवरील जगदंबा हॉस्पिटलसमोरील रस्त्यावर कारवाई करत पोलिसांनी बोलेरो वाहनातून नेण्यात येत असलेली अवैध देशी दारू जप्त केली आहे. या कारवाईत ५३ हजार ७६० रुपयांच्या दारूसह १२ लाख रुपये किमतीचे वाहन मिळून एकूण १२ लाख ५३ हजार ७६० रुपयांचा मुद्देमाल जप्त करण्यात आला. शुक्रवार, २१ ऑगस्ट रोजी रात्री १२ वाजण्याच्या सुमारास ही कारवाई करण्यात आली.
सपोनि. आदित्या लोणीकर, पोउपनि. तुळशीराम चिटेवार, पोलीस अंमलदार परसराम गायकवाड, सुदाम धुळगुंडे, गणेश खोमणे यांच्या पथकाने ही कारवाई केली. विठ्ठल विश्वनाथ कदम, वय ३८ वर्षे आणि नागनाथ शिवाजी लोंढे, वय ३२ वर्षे, दोघे रा. खोरस, ता. पालम, यांच्याकडून एम.एच. २२ बी.के. १७१५ क्रमांकाचे बोलेरो वाहन ताब्यात घेण्यात आले.
या वाहनात देशी दारूचे चौदा बॉक्स मिळून आले. सदर प्रकरणी पोलीस अंमलदार सुदाम धुळगुंडे यांच्या फिर्यादीवरून आरोपींवर गुन्हा नोंदविण्यात आला आहे. तपास पोह. गणेश खोमणे करत आहेत.
