हिंगोली (Chhatrapati Sambhaji Maharaj) : धर्मवीर छत्रपती संभाजी महाराज यांच्या ३६९ व्या जयंतीनिमित्त छावा दलाच्या वतीने भव्य जन्मोत्सव सोहळ्याचे आयोजन करण्यात येणार आहे. या पार्श्वभूमीवर सोमवार २१ एप्रिल २०२६ रोजी हिंगोली येथील शासकीय विश्रामगृहात छावा दलाचे संस्थापक अध्यक्ष विनायकराव भिसे पाटील यांच्या मार्गदर्शनाखाली नियोजन व आढावा बैठक संपन्न झाली.
या बैठकीत संभाजी महाराजांच्या जयंती (Chhatrapati Sambhaji Maharaj) सोहळ्यास अधिक आकर्षक व भव्य-दिव्य स्वरूप देण्यासाठी विविध विषयांवर सविस्तर चर्चा करण्यात आली. यामध्ये ढोल-ताशा पथक, नगाडे, पारंपरिक दिखावे, उंट-घोड्यांचे पथक यांसह महाराजांच्या शौर्यगाथा उलगडणाऱ्या कलाकृती सादर करण्याचे नियोजन करण्यात आले. जयंती उत्सवात जास्तीत जास्त शिव-शंभू प्रेमींनी सहभागी व्हावे यासाठी तालुकास्तरावर जनजागृती करण्याचा निर्णयही घेण्यात आला.
यावेळी छावा दलाचे संस्थापक उपाध्यक्ष पप्पू भाऊ चव्हाण, जिल्हा अध्यक्ष एड. रमेश शिंदे, दीपक वाघ, अनिलराव शिंदे, बालाजीराव भिसे, अविनाश चव्हाण, राजूभाऊ पाटील, प्रा. अंभोरे, प्रा. कल्याणकर , मोरे , गोपाल चव्हाण, गोपाल मस्के, रवी इंगळे, परमेश्वर नाईकवाल यांच्यासह छावा दलाचे अनेक पदाधिकारी व कार्यकर्ते मोठ्या संख्येने उपस्थित होते. बैठकीच्या समारोपप्रसंगी विनायकराव भिसे पाटील यांनी सर्व पदाधिकाऱ्यांना जयंती सोहळा यशस्वी करण्यासाठी एकजुटीने काम करण्याचे आवाहन केले. शिस्तबद्ध व भव्य स्वरूपात संभाजी महाराजांची जयंती साजरी करून त्यांच्या विचारांचा जागर करू, असा निर्धार यावेळी व्यक्त करण्यात आला.
