उपविभागीय अधिकारी समाधान घुटुकडे यांची माहिती
हिंगोली (Hingoli Administration): घरकुल योजनेच्या लाभार्थ्यांची वाळूअभावी रखडलेली बांधकामे आता मार्गी लागणार आहेत. हिंगोली व सेनगाव तालुक्यातील घरकुल लाभार्थ्यांना प्रत्येकी पाच ब्रास वाळू मोफत देण्याचा निर्णय प्रशासनाने घेतल्याची माहिती उपविभागीय अधिकारी समाधान घुटुकडे यांनी 24 एप्रिल ला दिली.
जिल्ह्यात वाळू मिळत नसल्याने अनेक घरकुले अर्धवट अवस्थेत होती. पावसाळा तोंडावर आल्याने बांधकामे पूर्ण करण्याची चिंता लाभार्थ्यांना सतावत होती. लाभार्थ्यांच्या मागणीनंतर उपविभागीय अधिकारी घुटुकडे व तहसीलदार श्रीकांत भुजबळ यांच्या समितीने मोफत वाळू वाटपाचा निर्णय घेतला.
हिंगोली तालुक्यात कयाधू नदीवरील आमला घाटावरून २९४ ब्रास, इडोळी ९९ ब्रास, हिंगणी ६१ ब्रास, खरबी ७० ब्रास तर खंबाळा घाटावरून १०९ ब्रास वाळू वाटप होणार आहे. २७ ते २९ एप्रिल या तीन दिवसांत ग्राम महसूल अधिकाऱ्यांकडून परमीट घेऊन लाभार्थ्यांना वाळू नेता येणार आहे. सेनगाव तालुक्यातील लाभार्थ्यांनीही परमीट घेऊन स्वतःच्या वाहनाने वाळू वाहतूक करावी, असे आवाहन समाधान घुटुकडे यांनी केले.
दरम्यान, हिंगोली व सेनगाव तालुक्यातील १ जानेवारी २०११ पूर्वीच्या शासकीय जमिनीवरील अतिक्रमणेदेखील नियमित केली जाणार आहेत. यात हिंगोली शहरातील रिसाला बाजार व सेनगाव येथील इंदिरानगर भागाचा समावेश आहे. शहरातील लाभार्थ्यांनी नगरपालिकेकडे तर ग्रामीण भागातील लाभार्थ्यांनी गटविकास अधिकाऱ्यांकडे कागदपत्रे सादर करावीत. पथकांमार्फत सर्वेक्षण झाल्यानंतर समितीच्या बैठकीत पात्र प्रकरणे नियमित केली जातील, असेही समाधान घुटुकडे यांनी स्पष्ट केले.
