मानोरा : मानोरा पोलीस ठाण्याच्या हद्दीतील मौजे गव्हा येथे सार्वजनिक रस्त्यावर सुरू असलेल्या जुगार अड्ड्यावर पोलिसांनी छापा टाकून दोघांना रंगेहात पकडले. ही कारवाई २२ ऑगस्ट २०२६ रोजी सायंकाळी ४.३० वाजेच्या सुमारास करण्यात आली. या कारवाईत रोख रकमेसह मोबाईल आणि ताशाच्या पत्त्यांसह एकूण ४६ हजार ७६० रुपयांचा मुद्देमाल जप्त करण्यात आला.
पोलिसांनी दिलेल्या माहितीनुसार, गव्हा बिटचे पोलीस अंमलदार मदन रामकृष्ण पुणेवार यांना गुप्त बातमीदारामार्फत माहिती मिळाली होती की, गव्हा येथील जगदंबा हॉटेलच्या बाजूच्या गल्लीत काही इसम ५२ पत्त्यांवर पैशांची हार-जीत करत जुगार खेळत आहेत. माहिती मिळताच पोलीस पथकाने स्टाफ आणि पंचांसह घटनास्थळी धाड टाकली.
पोलिसांची कारवाई सुरू होताच तेथे जुगार खेळणाऱ्या तीन इसमांपैकी एक जण पळून गेला, तर दोघांना पोलिसांनी जागीच ताब्यात घेतले. पकडण्यात आलेल्या आरोपींची नावे कमल गणेश चव्हाण (वय ३०) आणि ऋषीकेश किशोर राठोड (वय २५), दोघेही रा. गव्हा, अशी आहेत.
आरोपींची अंगझडती घेतली असता कमल चव्हाण याच्याकडून तीन ताशाचे पत्ते, ७४० रुपये रोख तसेच १५ हजार रुपये किमतीचा सिल्व्हर रंगाचा विवो कंपनीचा मोबाईल जप्त करण्यात आला. तर ऋषीकेश राठोड याच्याकडून तीन ताशाचे पत्ते, ५९० रुपये रोख आणि १५ हजार रुपये किमतीचा मोरपंखी रंगाचा ओप्पो कंपनीचा मोबाईल मिळून आला.
या कारवाईत एकूण ४६ ताशाचे पत्ते, ७४० रुपये रोख रकमेसह ४६ हजार ७६० रुपयांचा मुद्देमाल जप्त करण्यात आला आहे.
या प्रकरणी मानोरा पोलीस स्टेशनमध्ये कलम १२ (अ) महाराष्ट्र जुगार कायद्यानुसार गुन्हा दाखल करण्यात आला आहे. प्रकरणाचा पुढील तपास बीट पोलीस हवालदार मदन पुणेवार करीत आहेत.
