हडको कॉर्नर परिसरातील वॉटर प्लांटमध्ये सुरू होता जुगाराचा डाव; आठ जणांविरुद्ध गुन्हा दाखल
परभणी : शहरातील हडको कॉर्नर परिसरात वॉटर प्लांटमध्ये सुरू असलेल्या जुगाराच्या डावावर नवा मोंढा पोलिसांनी छापा टाकून २ लाख ५ हजार १६० रुपयांचा मुद्देमाल जप्त केला. ही कारवाई २७ ऑगस्ट रोजी सायंकाळी सुमारे ७ वाजता करण्यात आली. या प्रकरणी नवा मोंढा पोलीस ठाण्यात गुन्हा दाखल करण्यात आला आहे.
सपोनि कासले यांच्या मार्गदर्शनाखाली पोउपनि डोंबे यांच्यासह पोलीस अंमलदार मोहसिन, सुरवसे, खुपसे, लोमंटे, सय्यद अक्रम आणि अनिल कटारे यांचे पथक अवैध धंद्यांची माहिती घेत परिसरात गस्त घालत होते. याचदरम्यान पथकाला हडको कॉर्नर परिसरातील वॉटर प्लांटमध्ये जुगार सुरू असल्याची माहिती मिळाली.
माहितीच्या आधारे पोलिसांनी संबंधित ठिकाणी कारवाई केली. छाप्यात रोख रक्कम आणि जुगाराचे साहित्य आढळून आले. पोलिसांनी या सर्व मुद्देमालासह एकूण २ लाख ५ हजार १६० रुपयांचा मुद्देमाल जप्त केला.
दरम्यान, या कारवाईनंतर पोलीस अंमलदार रामराव खुपसे यांच्या फिर्यादीवरून वैभव जामगे, प्रसिक वावळे, शेख मुज्जसीर, रंजीत सूर्यवंशी, मिर्झा जाफर अली बेग, सुनिल जाधव, रोहन पंडीत आणि गौतम निवडंगे यांच्याविरुद्ध नवा मोंढा पोलीस ठाण्यात गुन्हा दाखल करण्यात आला आहे.
