निवडणूक आयोगातील कथित मतभेदांवरून ठाकरे यांचा निशाणा; विरोधकांनी एकत्र येण्याचे आवाहन
मुंबई : निवडणूक आयोगातील कथित अंतर्गत मतभेदांच्या पार्श्वभूमीवर राजकीय वातावरण तापले आहे. मुख्य निवडणूक आयुक्त ज्ञानेश कुमार यांच्याविरोधात शिवसेना (उद्धव बाळासाहेब ठाकरे) पक्षाचे पक्षप्रमुख उद्धव ठाकरे यांनी तीव्र भूमिका मांडली. ज्ञानेश कुमार यांनी पदाचा राजीनामा द्यावा आणि त्यांच्यावर कारवाई करून तुरुंगात पाठवावे, अशी मागणी ठाकरे यांनी पत्रकार परिषदेत केली. तसेच लोकशाहीच्या मुद्द्यावर सर्व विरोधी पक्षांनी एकत्र येण्याचे आवाहनही त्यांनी केले.
उद्धव ठाकरे यांच्या मते, गेल्या काही वर्षांपासून निवडणूक आयोगाच्या निर्णयांबाबत विरोधकांकडून प्रश्न उपस्थित केले जात आहेत. आयोगातील दोन निवडणूक आयुक्तांनी काही निर्णयांवर आक्षेप घेतल्याच्या वृत्ताचा संदर्भ देत ठाकरे यांनी आयोगाच्या कामकाजावर गंभीर प्रश्न उपस्थित केले. या पार्श्वभूमीवर त्यांनी ज्ञानेश कुमार यांच्यावर लोकशाही प्रक्रियेला बाधा आणल्याचा आरोप केला.
VIDEO | Mumbai: Shiv Sena (UBT) chief Uddhav Thackeray says, "Until now, only we, meaning the Opposition, have been saying this. Perhaps, for the first time in the country's history, something like this has happened. There are three Election Commissioners in the Election… pic.twitter.com/PvUCkITkNV
— Press Trust of India (@PTI_News) September 23, 2026
निवडणूक आयोगातील निर्णयांबाबत दोन आयुक्तांनी आक्षेप नोंदवल्याचा दावा The Indian Expressच्या वृत्तात करण्यात आला आहे. त्यानुसार निवडणूक आयुक्त सुखबीर सिंह संधू आणि विवेक जोशी यांनी गेल्या १० महिन्यांत काही निर्णयांवर आक्षेप नोंदवल्याचे सांगण्यात आले आहे. यामध्ये मतदार यादीतील बदल, फॉर्म-६ आणि मतदार नोंदणीशी संबंधित बाबींचा समावेश असल्याचे वृत्त आहे.
दरम्यान, या दाव्यांवर निवडणूक आयोगाच्या सूत्रांनी वेगळी भूमिका मांडली आहे. आयोगातील सर्व निर्णय, त्यात विशेष सखोल पुनरिक्षण अर्थात SIR प्रक्रियेचाही समावेश असून, तिन्ही निवडणूक आयुक्तांच्या मंजुरीनेच घेतले जात असल्याचे आयोगाच्या सूत्रांनी स्पष्ट केले आहे.
उद्धव ठाकरे यांनी निवडणूक आयोगाच्या कार्यपद्धतीवर टीका करताना आयोग गृह मंत्रालयाच्या सूचनांनुसार काम करत असल्याचा आरोप केला. शिवसेनेशी संबंधित निर्णयांचा उल्लेख करत त्यांनी पक्षाचे नाव आणि निवडणूक चिन्ह दुसऱ्या गटाला देण्यात आल्याचा दावा केला. राष्ट्रवादी काँग्रेसनंतर तृणमूल काँग्रेसबाबतही अशाच प्रकारची परिस्थिती निर्माण होईल, असा आरोप त्यांनी केला.
महाराष्ट्रातील लोकसभा निवडणुकीचाही संदर्भ देत ठाकरे यांनी महाविकास आघाडीला चांगले मतदान मिळाल्याचा दावा केला. तसेच सुमारे ४० लाख मतदारांची नावे वगळल्याचा आरोप त्यांनी केला. याच मुद्द्यावरून त्यांनी निवडणूक प्रक्रियेबाबत प्रश्न उपस्थित केले.
ठाकरे यांनी विरोधी पक्षांना एकत्र येण्याचे आवाहन करत लोकशाहीच्या संरक्षणासाठी व्यापक भूमिका घेण्याची गरज व्यक्त केली. भाजपमध्येही लोकशाहीच्या बाजूने भूमिका घेणारे नेते आणि कार्यकर्ते असल्यास त्यांनी या लढ्यात सहभागी व्हावे, असे आवाहन त्यांनी केले.
यावेळी उद्धव ठाकरे यांनी निवडणूक आयुक्त सुखबीर सिंह संधू आणि विवेक जोशी यांनी कथित आक्षेप नोंदवण्याचे धाडस दाखवल्याचे सांगत त्यांचे कौतुक केले. तसेच प्रसारमाध्यमांनीही या विषयावर निर्भीडपणे भूमिका मांडण्याची गरज असल्याचे ते म्हणाले. दरम्यान, विरोधकांकडून ज्ञानेश कुमार यांच्या हटवण्याची मागणी होत असताना निवडणूक आयोगाने मात्र सर्व निर्णय एकमताने झाल्याचे स्पष्ट केले आहे.
