महिला उद्योजकांना मिळाले हक्काचे व्यासपीठ; स्थानिक व्यवसायांना चालना
हिंगोली (Direct Marketplace) : महिला उद्योजकांना स्वतःच्या उत्पादनांचे प्रदर्शन आणि विक्रीसाठी प्रभावी व्यासपीठ उपलब्ध करून देण्याच्या उद्देशाने आयोजित करण्यात आलेले ‘अमृत पेठ – थेट बाजारपेठ’ हे प्रदर्शन व विक्री महोत्सव ५ आणि ६ जून रोजी शेतकरी भवन, मंगळवारा येथे उत्साहपूर्ण वातावरणात यशस्वीरित्या पार पडले. या दोन दिवसीय उपक्रमाला नागरिकांचा उत्स्फूर्त प्रतिसाद लाभला.
प्रदर्शनाच्या उद्घाटन व आयोजन प्रसंगी राज्य समन्वयक दीपक जोशी, विभागीय व्यवस्थापक अमित सावंत, विभागीय उपव्यवस्थापक ओमकार शेटे तसेच नगरसेवक कपिल भैया खंडेलवाल यांची प्रमुख उपस्थिती होती. मान्यवरांनी विविध स्टॉलना भेट देत महिला उद्योजकांशी संवाद साधला आणि त्यांच्या उपक्रमांचे कौतुक केले. अशा प्रदर्शनांमुळे स्थानिक उद्योग व व्यवसायांना नवी संधी मिळत असल्याचे त्यांनी नमूद केले.
विविध उत्पादनांनी सजलेली बाजारपेठ
प्रदर्शनात महिला उद्योजकांनी साड्या, ड्रेस मटेरियल, ज्वेलरी, गृहसजावटीच्या वस्तू, हस्तकला उत्पादने तसेच विविध खाद्यपदार्थांचे आकर्षक स्टॉल उभारले होते. दर्जेदार आणि वैविध्यपूर्ण उत्पादनांमुळे नागरिकांनी मोठ्या संख्येने प्रदर्शनाला भेट देत खरेदीचा आनंद घेतला.
उद्योजकांना थेट ग्राहकांपर्यंत पोहोचण्याची संधी
दोन दिवस चाललेल्या या महोत्सवामुळे स्थानिक उद्योजकांना आपल्या उत्पादनांचे प्रदर्शन आणि विक्री करण्याची संधी मिळाली. ग्राहक आणि विक्रेते यांच्यात थेट संपर्क निर्माण झाल्याने उद्योजकांना व्यवसायवृद्धीसाठी नवे मार्ग उपलब्ध झाले. प्रदर्शन परिसरात दोन्ही दिवस उत्साहाचे आणि खरेदी-विक्रीचे वातावरण पाहायला मिळाले.
आयोजकांकडून आभार
कार्यक्रमाच्या यशस्वी आयोजनासाठी सर्व स्टॉलधारक, महिला उद्योजक, ग्राहक, स्वयंसेवक तसेच सहकार्य करणाऱ्या सर्वांचे आयोजकांनी आभार मानले. भविष्यातही अशाच उपक्रमांच्या माध्यमातून महिला उद्योजकता, स्वयंरोजगार आणि स्थानिक व्यवसायांना प्रोत्साहन देण्याचा संकल्प व्यक्त करण्यात आला.
"दर्जेदार खरेदीची खात्री – अमृत पेठ तुमच्यासाठी" या घोषवाक्याला नागरिकांकडून मिळालेल्या भरघोस प्रतिसादामुळे आयोजकांनी समाधान व्यक्त केले.
