मुकुंदनगर दर्गा दायरा परिसरातील हल्ल्यात धीरज परदेशीचा उपचारादरम्यान मृत्यू; हल्ल्यामागील कारण अद्याप अस्पष्ट
अहिल्यानगर : शहरातील मुकुंदनगर परिसरात विद्युत पोलचे काम करत असलेल्या महानगरपालिकेच्या कंत्राटी कर्मचाऱ्यावर झालेल्या हल्ल्यात त्याचा उपचारादरम्यान मृत्यू झाला. धीरज परदेशी असे मृत कर्मचाऱ्याचे नाव असून, या घटनेनंतर शहरात तणावाचे वातावरण निर्माण झाले आहे. प्रकरणी भिंगार कॅम्प पोलिसांनी चार जणांना अटक केली आहे.
शुक्रवारी सायंकाळी मुकुंदनगर दर्गा दायरा परिसरातील कबरस्तानात विद्युत पोलचे काम सुरू असताना धीरज परदेशी यांच्यावर हल्ला करण्यात आला. हल्ल्यानंतर आरोपी घटनास्थळावरून पसार झाले होते. गंभीर जखमी अवस्थेत धीरज यांना उपचारासाठी खासगी रुग्णालयात दाखल करण्यात आले; मात्र उपचार सुरू असतानाच त्यांचा मृत्यू झाला.
या प्रकरणी पोलिसांनी तपासाची चक्रे वेगाने फिरवत काल रात्री चार मुख्य आरोपींना अटक केली. युनूस शेख, मेहराज सय्यद, सिराज सय्यद आणि मुस्तकीम सय्यद अशी अटक करण्यात आलेल्या आरोपींची नावे आहेत.
धीरज परदेशी यांच्यावर हल्ला नेमका कोणत्या कारणातून करण्यात आला, हे अद्याप स्पष्ट झालेले नाही. पोलिसांकडून या घटनेचा तपास सुरू आहे. दरम्यान, धीरज हे हिंदुत्ववादी असल्याने त्यांच्यावर हल्ला करण्यात आल्याचा आरोप त्यांच्या पत्नीने केला आहे. मात्र, या आरोपाची स्वतंत्रपणे पुष्टी अद्याप झालेली नाही.
घटनेनंतर अहिल्यानगर शहरातील वातावरण तणावपूर्ण झाले असून, हिंदुत्ववादी संघटनांकडून बंदचा इशारा देण्यात आला आहे. परिस्थितीचे गांभीर्य लक्षात घेऊन पोलिसांनी घटनास्थळी धाव घेतली असून, कायदा-सुव्यवस्था कायम ठेवण्यासाठी प्रयत्न सुरू आहेत.
दरम्यान, पतीवर ज्या कबरस्तानात हल्ला झाला, त्याच ठिकाणी त्यांचा अंत्यविधी करण्यात यावा, अशी भावनिक मागणी धीरज परदेशी यांच्या पत्नीने केली आहे. या घटनेमागील नेमके कारण आणि हल्ल्याचा संपूर्ण घटनाक्रम पोलिसांच्या तपासानंतर स्पष्ट होणार आहे.
