मध्य प्रदेशातील इमरान शेख रोजगाराच्या शोधात दोन दिवसांपूर्वी मुंबईत आला होता; शौचालयात बेशुद्धावस्थेत आढळल्यानंतर रुग्णालयात मृत घोषित
मुंबई : छत्रपती शिवाजी महाराज टर्मिनस (CSMT) येथील रेल्वे पोलिसांच्या कोठडीत मध्य प्रदेशातील 35 वर्षीय तरुणाचा मृत्यू झाल्याची घटना समोर आली आहे. खंडवा येथील इमरान शेख हा रोजगाराच्या शोधात दोन दिवसांपूर्वी मुंबईत आला होता. या घटनेनंतर प्रकरणाच्या चौकशीची जबाबदारी महाराष्ट्र CIDकडे सोपवण्यात आली आहे.
मध्य रेल्वेच्या माहितीनुसार, 20 सप्टेंबर रोजी सकाळी 10 वाजून 18 मिनिटांच्या सुमारास इमरान सीएसएमटी मुख्य आरपीएफ पोस्टवर आला होता. खंडव्याला जाणाऱ्या रेल्वेगाड्यांची माहिती घेण्यासाठी तो तेथे पोहोचला होता. त्यावेळी तो अस्वस्थ अवस्थेत असल्याचे सांगण्यात आले. काहीजण आपल्याला मारण्याचा प्रयत्न करत असल्याचा दावा तो करत होता, अशी माहिती रेल्वे प्रशासनाने दिली आहे.
यानंतर इमरान आक्रमक झाल्याचे आरपीएफकडून सांगण्यात आले. त्याने आरपीएफचे SI अनिकेत यांच्यावर हल्ला केला तसेच स्वतःलाही इजा करून घेतली, असा दावा करण्यात आला आहे. स्वतःला किंवा इतरांना इजा होऊ नये यासाठी त्याला आवरण्यात आल्याचे आरपीएफचे म्हणणे आहे.
शौचालयात गेल्यानंतर काही मिनिटांत बेशुद्ध
सुमारे 12.30 वाजता इमरानला शौचालयाचा वापर करण्याची परवानगी देण्यात आली. मात्र, सात ते आठ मिनिटे उलटूनही आतून कोणताही प्रतिसाद मिळाला नाही. त्यामुळे शौचालयाचा दरवाजा उघडण्यात आला असता इमरान आतमध्ये बेशुद्ध अवस्थेत आढळून आला.
त्यानंतर त्याला तातडीने सेंट जॉर्ज रुग्णालयात नेण्यात आले. मात्र, सुमारे 12.54 वाजता रुग्णालयात दाखल केल्यानंतर डॉक्टरांनी त्याला मृत घोषित केले. घटनेनंतर सीएसएमटी जीआरपीने अनैसर्गिक मृत्यूची नोंद केली आहे.
दरम्यान, इमरानच्या नातेवाईकांनी जीआरपीच्या कार्यपद्धतीवर गंभीर प्रश्न उपस्थित केले असून, त्याला मारहाण करण्यात आल्याचा आरोपही केला आहे.
इमरानकडे रेल्वेची दोन तिकिटे
मध्य रेल्वे प्रशासनाच्या माहितीनुसार, इमरानने यापूर्वी जीआरपी कर्मचाऱ्यांवर हात उचलला होता. त्याच्याकडे कोणतेही ओळखपत्र किंवा मोबाईल फोन आढळला नसल्याचे प्रशासनाने सांगितले. मात्र, त्याच्याकडे रेल्वेची दोन जनरल तिकिटे सापडली.
यातील एक तिकीट खंडवा-भुसावळ, 18 सप्टेंबर 2026 रोजीचे, तर दुसरे नाशिक-दादर, 19 सप्टेंबर 2026 रोजीचे असल्याची माहिती मध्य रेल्वेने दिली आहे. इमरानची ओळख पटवण्यासाठी त्याचा फोटो भुसावळ विभाग तसेच स्थानिक पोलिसांकडे पाठवण्यात आला आहे.
इमरान मुंबईत नेमका कोणत्या कारणासाठी आला होता आणि या काळात त्याच्या कोणत्या हालचाली झाल्या, याचाही तपास केला जात आहे.
CIDकडे तपास; पोस्टमार्टम अहवालाची प्रतीक्षा
आरपीएफच्या ताब्यात असताना इमरानचा मृत्यू झाल्याने या प्रकरणाची चौकशी महत्त्वाची ठरली आहे. त्यामुळे तपास महाराष्ट्र पोलिसांच्या CIDकडे सोपवण्यात आला आहे. CID कोकण रेंजचे SP प्रशांत वाघुंडे यांच्या नेतृत्वाखाली तपास सुरू असल्याची माहिती आहे.
इमरानच्या मृतदेहाचे जेजे रुग्णालयात पोस्टमार्टम करण्यात आले आहे. आता पोस्टमार्टम अहवालाची प्रतीक्षा आहे. या अहवालासोबतच सीसीटीव्ही फुटेजच्या तपासातून इमरानच्या मृत्यूमागील नेमके कारण आणि त्यावेळची परिस्थिती स्पष्ट होण्याची शक्यता आहे.
