पालम पोलिसांची मोजमाबाद परिसरात कारवाई; दोन कंटेनर चालकांसह गोवंशाच्या मालकांविरुद्ध गुन्हा, आरोपींना अटक
परभणी : पालम तालुक्यात गोवंशाची निर्दयपणे वाहतूक केल्याप्रकरणी पालम पोलिसांनी मोठी कारवाई केली आहे. कत्तलीसाठी घेऊन जात असलेल्या २८ बैलांची सुटका करण्यात आली असून, या कारवाईत कंटेनरसह एकूण ३३ लाख ६० हजार रुपयांचा मुद्देमाल पोलिसांनी जप्त केला आहे. गुरुवार, २७ ऑगस्ट रोजी दुपारी मोजमाबाद परिसरात ही कारवाई करण्यात आली.
मोजमाबाद ते माळेगाव मार्गावरून एम.एच.०४ जी.आर. ००५३ क्रमांकाच्या कंटेनरमधून गोवंशाची वाहतूक होत असल्याची माहिती पालम पोलिसांना मिळाली. या माहितीच्या आधारे पोलिसांनी संबंधित कंटेनर अडवून ताब्यात घेतला. तपासणीदरम्यान कंटेनरमध्ये २८ बैलांची निर्दयपणे वाहतूक केली जात असल्याचे निदर्शनास आले.
कारवाईदरम्यान सुमारे १५ लाख रुपये किमतीचा कंटेनर आणि अंदाजे १८ लाख ६० हजार रुपये किमतीचे २८ बैल, असा एकूण ३३ लाख ६० हजार रुपयांचा मुद्देमाल पोलिसांनी जप्त केला.
या प्रकरणी खलील अहमद गुलाम कादीर (वय ४३, रा. गुलशन नगर, मालेगाव, जि. नाशिक) आणि करीम समद शेख (वय ५०, रा. शाफेपुर, छत्रपती संभाजीनगर) यांच्यासह गोवंशाच्या मालकांविरुद्ध पालम पोलीस ठाण्यात गुन्हा दाखल करण्यात आला आहे. संबंधित आरोपींना अटक करण्यात आली आहे.
पोलीस शिपाई सुदाम धुळगुंडे यांच्या फिर्यादीवरून या प्रकरणाची नोंद करण्यात आली. पोलीस निरीक्षक आदित्य लोणीकर यांच्या मार्गदर्शनाखाली पोलीस उपनिरीक्षक तुळशीराम चिटेवार पुढील तपास करीत आहेत.
