BLA नियुक्तीत राज्यात प्रथम क्रमांक; संघटनात्मक बांधणीत मोठे यश
हिंगोली (BLA Appointment) : शिवसेना मुख्य नेते तथा राज्याचे उपमुख्यमंत्री एकनाथ शिंदे, युवा सेना प्रमुख खासदार डॉ. श्रीकांत शिंदे आणि युवा सेना कार्याध्यक्ष पूर्वेश सरनाईक यांच्या मार्गदर्शनाखाली हिंगोली जिल्ह्यात युवा सेनेने संघटनात्मक पातळीवर उल्लेखनीय कामगिरी नोंदवली आहे. शिवसेना जिल्हाप्रमुख तथा आमदार संतोष बांगर यांच्या नेतृत्वात युवा सेना जिल्हाप्रमुख राम कदम यांनी हिंगोली, कळमनुरी आणि वसमत या तिन्ही विधानसभा मतदारसंघांमध्ये १०० टक्के बीएलए (Booth Level Agent) नियुक्त्या पूर्ण करून युवा सेनेची भक्कम संघटनात्मक फळी उभी केली आहे.
होऊ घातलेल्या जिल्हा परिषद निवडणुकांच्या पार्श्वभूमीवर युवा सेनेकडून गावपातळीपर्यंत शाखा विस्तारावर विशेष भर दिला जात आहे. युवकांचे संघटन अधिक मजबूत करण्यासाठी विविध उपक्रम राबविण्यात येत असून प्रत्येक बूथवर कार्यकर्त्यांची नियुक्ती करून पक्षाची मुळे गावागावात अधिक दृढ करण्याचे उद्दिष्ट ठेवण्यात आले आहे.
राज्यात प्रथम क्रमांकाची कामगिरी
बीएलए नियुक्ती मोहिमेत हिंगोली जिल्ह्याने उल्लेखनीय यश संपादन करत महाराष्ट्रात प्रथम क्रमांक पटकावला आहे. या यशाबद्दल युवा सेना प्रमुख खासदार डॉ. श्रीकांत शिंदे आणि युवा सेना कार्याध्यक्ष पूर्वेश सरनाईक यांनी युवा सेना जिल्हाप्रमुख राम कदम यांचे विशेष अभिनंदन केले आहे.
यावेळी आगामी निवडणुकांमध्येही याच उत्साहाने आणि जोमाने काम करून संघटना अधिक बळकट करण्यासाठी शुभेच्छा देण्यात आल्या. तसेच बूथस्तरावरील संघटनात्मक कामकाज अधिक प्रभावी करण्यावर भर देण्याचे आवाहन करण्यात आले.
कार्यकर्त्यांमध्ये उत्साहाचे वातावरण
हिंगोली जिल्ह्याच्या या यशस्वी कामगिरीमुळे युवा सेना कार्यकर्त्यांमध्ये नवचैतन्य निर्माण झाले असून आगामी जिल्हा परिषद निवडणुकांसाठी संघटना पूर्ण ताकदीने सज्ज झाली आहे. जिल्हाभरात युवकांचा वाढता सहभाग आणि मजबूत संघटनात्मक जाळे यामुळे आगामी काळात युवा सेनेची ताकद अधिक वाढणार असल्याचा विश्वास पदाधिकाऱ्यांनी व्यक्त केला.
