हिंगोली (BJP Workshop) : भारतीय जनता पक्षाच्या पंडित दीनदयाळ उपाध्याय प्रशिक्षण महाअभियान - 2026 अंतर्गत हिंगोली जिल्हास्तरीय दोन दिवसीय निवासी कार्यशाळेचे आयोजन करण्यात आले आहे. 16 व 17 मे रोजी शहरातील हॉटेल शांती येथे ही कार्यशाळा पार पडणार आहे.
शनिवारी सकाळी 9 वाजता मान्यवरांच्या उपस्थितीत या कार्यशाळेचा प्रारंभ होणार आहे. समर्थ कार्यकर्ता सशक्त संघटना संकल्पनेवर आधारित या निवासी कार्यशाळेचा मुख्य उद्देश पक्षाची विचारधारा, संघटनात्मक बांधणी आणि केंद्र व राज्य सरकारच्या लोककल्याणकारी योजनांचा तळागाळातील लोकांपर्यंत प्रभावी प्रसार करणे हा आहे.
वरिष्ठ नेत्यांचे लाभणार मार्गदर्शन :
दोन दिवसीय प्रशिक्षणात विविध सत्रांमध्ये कार्यकर्त्यांना पक्षाच्या वरिष्ठ नेत्यांचे मार्गदर्शन लाभणार आहे. यामध्ये माजी केंद्रीय राज्यमंत्री भागवत कराड, प्रदेश सरचिटणीस सुनिल राणे, प्रदेश उपाध्यक्ष संजय कौडगे, विधान परिषद सदस्य प्रा. संजय भेंडे, मराठवाडा संयोजक मनोज पांगरकर, प्रदेश सचिव प्रविण घुगे, माजी जिल्हाध्यक्ष नितीन भुतडा, प्रदेश प्रवक्ता लक्ष्मणराव सावजी, प्रदेश प्रवक्ता विनोद वाघ, भाजप नेते किरण पातुरकर यांचा समावेश आहे.
या कार्यशाळेला खासदार रामराव वडकुते, जिल्हा प्रभारी संजय कौडगे, आमदार तान्हाजीराव मुटकुळे, आमदार डॉ. प्रज्ञाताई सातव, माजी आ. जिल्हाध्यक्ष गजाननराव घुगे, जिल्हा संयोजक फुलाजीराव शिंदे, माजी जिल्हाध्यक्ष बाबाराव बांगर, अतिश दांडेगावकर यांची प्रमुख उपस्थिती राहणार आहे.
चित्र व माहिती फलकांचे प्रदर्शन :
कार्यशाळेच्या निमित्ताने पंडित दीनदयाळ उपाध्याय यांचा जीवनप्रवास, त्यांचा एकात्म मानववाद आणि अंत्योदय विचार मांडला जाणार आहे. तसेच भारतीय जनसंघापासून ते आजच्या भाजपपर्यंतचा ऐतिहासिक प्रवास, केंद्र व राज्य सरकारच्या जनकल्याणकारी योजना आणि हिंगोली जिल्ह्यात झालेल्या विकासकामांची माहिती चित्रांच्या व माहिती फलकांच्या प्रदर्शनातून मांडली जाणार असल्याची माहिती जिल्हा संयोजकांनी दिली.
