पाटसहून सुप्याकडे जाताना चालकाचे नियंत्रण सुटले; किरकोळ जखमी विद्यार्थ्यांवर चौफुल्यात उपचार
बारामती तालुक्यातील पाटस-सुपा मार्गावर शालेय विद्यार्थ्यांना घेऊन जाणाऱ्या एसटी बसला सुपे घाटात अपघात झाला. घाट चढताना बस अचानक मागे सरकली आणि काही अंतरावर जाऊन पलटी झाल्याची प्राथमिक माहिती आहे. या बसमध्ये सुमारे २५ ते ३० विद्यार्थी प्रवास करत होते. त्यापैकी २ ते ३ विद्यार्थ्यांना किरकोळ दुखापत झाली असून, उर्वरित विद्यार्थी सुरक्षित असल्याचे सांगण्यात येत आहे.
मिळालेल्या माहितीनुसार, एमएच २० बीएल ३१२१ क्रमांकाची बारामती डेपोची एसटी बस पाटसहून सुप्याच्या दिशेने निघाली होती. यवत पोलीस ठाण्याच्या हद्दीतील सुपे घाटातून बस पुढे जात असताना घाट चढण्याच्या वेळी अचानक बस मागे घसरू लागली. चालकाने बस नियंत्रणात आणण्याचा प्रयत्न केला; मात्र बस काही अंतर मागे गेल्यानंतर पलटी झाली. या घटनेमुळे बसमधील विद्यार्थ्यांमध्ये काही काळ घबराट निर्माण झाली.
अपघाताची माहिती मिळताच पोलीस पथक घटनास्थळी दाखल झाले. सुपे पोलीस ठाण्याचे प्रभारी अधिकारी सहाय्यक पोलीस निरीक्षक शशिकांत शेळके यांच्यासह त्यांच्या सहकाऱ्यांनी घटनास्थळी पाहणी करून मदतकार्य केले.
दुर्घटनेत जखमी झालेल्या दोन ते तीन विद्यार्थ्यांना पुढील उपचारासाठी चौफुला येथील हर्ष हॉस्पिटलमध्ये दाखल करण्यात आले आहे. विद्यार्थ्यांना गंभीर दुखापत झालेली नसल्याची प्राथमिक माहिती आहे.
दरम्यान, बसमधील इतर विद्यार्थ्यांची पोलिसांसह संबंधितांकडून तपासणी करण्यात आली. जखमी विद्यार्थ्यांना रुग्णालयात पाठवल्यानंतर सुरक्षित असलेल्या विद्यार्थ्यांना त्यांच्या पालकांच्या स्वाधीन करण्यात आले.
या अपघातामुळे पाटस-सुपा मार्गावरील वाहतुकीवर काही काळ परिणाम झाला. बस नेमकी कोणत्या कारणामुळे मागे सरकली, तसेच बसमध्ये काही तांत्रिक बिघाड होता का, याचा तपास पोलीस आणि संबंधित विभागाकडून सुरू आहे.
