गुरुग्रामच्या संभव जैनचा मृत्यू; सेक्टर-९४ येथील घटनेनंतर पोलीस आणि फॉरेन्सिक टीमकडून तपास सुरू
नोएडा : उत्तर प्रदेशातील नोएडा येथील सेक्टर-९४ परिसरातील प्रसिद्ध सुपरनोव्हा सोसायटीमध्ये शनिवारी सकाळी धक्कादायक घटना घडली. ‘स्पायरा’ इमारतीच्या ४३व्या मजल्यावरून उडी घेत एका तरुणाने आत्महत्या केल्याची माहिती समोर आली आहे. मृत तरुणाची ओळख संभव जैन अशी झाली असून तो हरियाणातील गुरुग्राममधील मानेसर सेक्टर-१ येथील रहिवासी होता.
पोलिसांच्या माहितीनुसार, संभव जैन एका दिवसाच्या मुक्कामासाठी सुपरनोव्हा इमारतीत एकटाच आला होता. शनिवारी सकाळी त्याने ४३व्या मजल्यावरील खोलीच्या बाल्कनीच्या रेलिंगवरून खाली उडी घेतली. उंचावरून पडल्याने झालेल्या गंभीर आघातात त्याचा मृत्यू झाला. या घटनेनंतर सोसायटी परिसरात खळबळ उडाली.
#Noida
— Pravendra Singh Sikarwar (@Pravendra_Sikar) October 3, 2026
Disturbing Video
सुपरनोवा के एस्पाइरा टॉवर के 40वीं मंजिल से कूदकर व्यक्ति ने किया सुसाइड। pic.twitter.com/t6QuLsD5cf
घटनेनंतर परिसरात मोठा आवाज झाल्याचे नागरिकांच्या लक्षात आले. त्यानंतर हा प्रकार उघडकीस आला. पोलिसांच्या प्राथमिक माहितीनुसार, मृतदेहाचा वरचा भाग टॉवरच्या तळमजल्यावर, तर खालचा भाग तिसऱ्या मजल्याच्या परिसरात आढळून आला.
माहिती मिळताच सेक्टर-१२६ पोलीस ठाण्याचे अधिकारी घटनास्थळी पोहोचले. फॉरेन्सिक टीमनेही घटनास्थळी पाहणी करून आवश्यक पुरावे जमा केले. पोलिसांकडून आता घटनास्थळावरील परिस्थिती आणि उपलब्ध पुराव्यांच्या आधारे तपास केला जात आहे.
प्राथमिक तपासात संभव जैन मागील काही दिवसांपासून गंभीर मानसिक तणावात असल्याचे समोर आल्याचे पोलिसांनी सांगितले आहे. या तणावातून त्याने टोकाचे पाऊल उचलले असावे, असा प्राथमिक अंदाज व्यक्त करण्यात आला आहे.
पोलिसांनी मृतदेह ताब्यात घेऊन पोस्टमॉर्टमसाठी पाठवला आहे. घटनेशी संबंधित सीसीटीव्ही फुटेजची तपासणी सुरू असून संभव जैनच्या कुटुंबीयांना याबाबत माहिती देण्यात आली आहे. या प्रकरणाचा पुढील तपास पोलीस करत आहेत.
