देऊळगाव राजा (Anti Drug Operation) : देऊळगाव राजा पोलिसांनी अंमली पदार्थांविरोधात मोठी कारवाई करत तब्बल ५.०५० किलो गांजा जप्त केला आहे. या प्रकरणी एका अल्पवयीन संशयिताला ताब्यात घेण्यात आले असून या कारवाईमुळे परिसरात एकच खळबळ उडाली आहे.
पोलिसांनी दिलेल्या माहितीनुसार, देऊळगाव राजा येथे २४ एप्रिल २०२६ रोजी पहाटे सुमारे पाच वाजण्याच्या सुमारास टाकरखेड भागिले शिवारातील गजानन महाराज हॉटेलसमोर ही कारवाई करण्यात आली. पोलीस उपनिरीक्षक राजकुमार हनमत मोहोळकर यांना मिळालेल्या गुप्त माहितीच्या आधारे पोलिस पथकाने तातडीने घटनास्थळी धाव घेतली.
तेथे संशयास्पद हालचाली करत असलेल्या एका युवकाची झडती घेतली असता त्याच्याकडे गांजासदृश अंमली पदार्थ आढळून आला. तपासणीदरम्यान एकूण ५.०५० किलो गांजा जप्त करण्यात आला. या मुद्देमालाची बाजारातील अंदाजे किंमत सुमारे १ लाख १ हजार रुपये असल्याचे पोलिसांनी सांगितले. तसेच आरोपीकडून एक मोबाईल फोन (किंमत सुमारे १० हजार रुपये) देखील जप्त करण्यात आला असून, एकूण १ लाख ११ हजार रुपयांचा मुद्देमाल पोलिसांनी ताब्यात घेतला आहे.
या प्रकरणी एनडीपीएस कायद्यांतर्गत पुढील कारवाई सुरू असून, अल्पवयीन संशयिताची चौकशी करण्यात येत आहे.
