इंधन तुटवड्याच्या पार्श्वभूमीवर शहबाज शरीफ सरकारचा निर्णय
होर्मुझ संकटामुळे ऊर्जा बचतीसाठी कठोर उपाययोजना
मध्य पूर्वेतील वाढत्या तणावामुळे आणि होर्मुझची सामुद्रधुनी येथे निर्माण झालेल्या वाहतूक कोंडीमुळे पाकिस्तानमध्ये इंधन संकट गडद झाले आहे. या पार्श्वभूमीवर पाकिस्तान सरकारने देशभरात ‘स्मार्ट लॉकडाउन’ लागू करण्याचा निर्णय घेतला आहे. हा आदेश मंगळवार, ७ एप्रिल २०२६ रोजी रात्री ८ वाजल्यापासून लागू होणार आहे.
पंतप्रधान शहबाज शरीफ यांच्या अध्यक्षतेखाली झालेल्या उच्चस्तरीय बैठकीत ऊर्जा बचतीसाठी विविध निर्बंध लागू करण्याचा निर्णय घेण्यात आला. या निर्णयानुसार सिंध वगळता इतर सर्व प्रांतांतील बाजारपेठा, शॉपिंग मॉल्स आणि किरकोळ दुकाने रात्री ८ वाजेपर्यंतच सुरू ठेवता येणार आहेत.
खैबर पख्तुनख्वा, पंजाब, बलुचिस्तान, इस्लामाबाद, गिलगिट-बाल्टिस्तान आणि PoJK भागात हे नियम लागू राहतील. खैबर पख्तुनख्वाच्या काही विभागीय मुख्यालयांमध्ये बाजारपेठांना रात्री ९ वाजेपर्यंत परवानगी देण्यात आली आहे.
दरम्यान, बेकरी, रेस्टॉरंट, तंदूर आणि खाद्यपदार्थ विक्रीची दुकाने रात्री १० वाजेपर्यंत सुरू ठेवण्यास मुभा देण्यात आली आहे. विवाह सोहळ्यांसाठी वापरल्या जाणाऱ्या सभागृहांना देखील रात्री १० वाजेपर्यंतच परवानगी असेल. त्यानंतर खाजगी ठिकाणी लग्नसमारंभ आयोजित करण्यास बंदी घालण्यात आली आहे.
औषधांची दुकाने आणि फार्मसींना मात्र या निर्बंधातून पूर्ण सूट देण्यात आली आहे. नागरिकांना आवश्यक सेवा अखंड सुरू ठेवण्यासाठी हा निर्णय घेण्यात आल्याचे सरकारने स्पष्ट केले आहे.
सिंध प्रांतात अद्याप हा निर्णय लागू करण्यात आलेला नसला तरी लवकरच तिथेही अशाच उपाययोजना राबवल्या जाण्याची शक्यता आहे. मुख्यमंत्री मुराद अली शाह यांनी व्यापारी संघटनांसोबत चर्चा सुरू केली असून त्यांच्या शिफारशींनुसार अंतिम निर्णय घेतला जाणार आहे.
दरम्यान, होर्मुझची सामुद्रधुनी मधील तणावामुळे जागतिक तेल पुरवठ्यावर मोठा परिणाम झाला आहे. अमेरिका-इराण संघर्षानंतर सागरी वाहतूक विस्कळीत झाल्याने दक्षिण आशियातील अनेक देशांमध्ये इंधन टंचाई निर्माण झाली आहे. या संकटाचा सामना करण्यासाठी पाकिस्तान सरकारकडून ऊर्जा बचतीवर भर देत कठोर पावले उचलली जात आहेत.
