गंभीर रक्तसंसर्ग आणि मेनिन्जाइटिसशी सुरू होती झुंज; बॉयफ्रेंडने दिली निधनाची पुष्टी
(Daveigh Chase) मनोरंजन विश्वाला सलग दुसरा धक्का बसला आहे. 'कुमकुम भाग्य' फेम अभिनेत्री संचिता उगले हिच्या निधनाची चर्चा सुरू असतानाच, हॉलीवूडमधील प्रसिद्ध अभिनेत्री आणि व्हॉइस ओव्हर आर्टिस्ट डेव्ही चेस हिच्या निधनाची बातमी समोर आली आहे. वयाच्या अवघ्या 35 व्या वर्षी डेव्हीने अखेरचा श्वास घेतल्याने तिचे चाहते आणि चित्रपटसृष्टीतील सहकारी हळहळ व्यक्त करत आहेत.
‘द रिंग’ या गाजलेल्या हॉरर चित्रपटातील ‘समारा मॉर्गन’ या भूमिकेमुळे जागतिक स्तरावर ओळख मिळवलेल्या डेव्ही चेसने आपल्या अभिनय आणि आवाजाच्या माध्यमातून प्रेक्षकांच्या मनावर वेगळी छाप पाडली होती. तिच्या अकाली निधनामुळे मनोरंजन क्षेत्रात शोककळा पसरली आहे.
मिळालेल्या माहितीनुसार, डेव्ही चेस काही काळापासून गंभीर आरोग्य समस्यांशी सामना करत होती. तिला मेनिन्जाइटिस आणि रक्तातील संसर्गाचा त्रास होता. कालांतराने हा संसर्ग अधिक गंभीर होत गेला आणि त्याचा परिणाम तिच्या संपूर्ण शरीरावर झाला. संसर्ग वाढत गेल्याने तिच्या विविध अवयवांनी हळूहळू काम करणे बंद केले, अशी माहिती समोर आली आहे.
मीडिया रिपोर्ट्सनुसार, मंगळवारी डेव्हीचे निधन झाले. तिच्या मृत्यूची माहिती तिच्या बॉयफ्रेंडनेही अधिकृतपणे दिली आहे. अखेरच्या काही दिवसांत तिला मोठ्या शारीरिक वेदनांचा सामना करावा लागल्याचे सांगितले जात आहे.
डेव्ही चेस ही अमेरिकन अभिनेत्री आणि व्हॉइस आर्टिस्ट होती. तिचा जन्म 24 जुलै 1990 रोजी लास वेगास येथे झाला होता. बालकलाकार म्हणून मनोरंजन क्षेत्रात प्रवेश केलेल्या डेव्हीने अभिनयासोबतच अनेक अॅनिमेशन प्रकल्पांमध्ये आवाज दिला होता.
डिस्नीच्या लोकप्रिय अॅनिमेटेड चित्रपट ‘Lilo & Stitch’ मधील मुख्य पात्र ‘लिलो’ला आवाज देऊन तिने विशेष लोकप्रियता मिळवली. त्यानंतर ‘द रिंग’ चित्रपटातील ‘समारा मॉर्गन’ या भयावह पात्राच्या भूमिकेमुळे ती जगभरातील प्रेक्षकांच्या विशेष पसंतीस उतरली. अभिनय आणि व्हॉइस ओव्हर या दोन्ही क्षेत्रांत तिने उल्लेखनीय कामगिरी करत स्वतःची वेगळी ओळख निर्माण केली होती.
