दुष्काळग्रस्त भागाची पाहणी करून घेणार आढावा बैठक
हिंगोली (Chandrashekhar Bawankule) : राज्याचे महसूल मंत्री चंद्रशेखर बावनकुळे हे सोमवार दिनांक २८ सप्टेंबर २०२६ रोजी हिंगोली आणि नांदेड जिल्ह्याच्या दौऱ्यावर येणार आहेत. त्यांच्या दौऱ्याचा अधिकृत कार्यक्रम महसूल मंत्री कार्यालयाकडून जाहीर करण्यात आला आहे.
प्राप्त कार्यक्रमानुसार, सोमवारी सकाळी ९ वाजता हिंगोली येथे दुष्काळग्रस्त भागाचा पीक पाहणी दौरा करून ते शेतकऱ्यांच्या बांधावर जाऊन नुकसानीची पाहणी करणार आहेत. त्यानंतर सकाळी १० ते ११ या वेळेत जिल्हाधिकारी कार्यालय हिंगोली येथे निवेदन स्वीकारण्यासाठी वेळ राखीव ठेवण्यात आला आहे. सकाळी ११ ते १२ या वेळेत जिल्हाधिकारी कार्यालयातच दुष्काळजन्य परिस्थितीची आढावा बैठक घेण्यात येणार आहे.
या बैठकीत जिल्ह्यातील पाचही तालुक्यांमध्ये जाहीर झालेल्या दुष्काळी परिस्थिती, करण्यात आलेल्या पंचनाम्यांचा आढावा आणि शासनाने जाहीर केलेल्या उपाययोजना राबवण्याबाबत चर्चा होणार आहे. दुपारी १२ वाजता ते मोटारीने हिंगोली येथून नांदेडकडे रवाना होणार आहेत. एकीकडे दुष्काळग्रस्त परिस्थितीमुळे मध्यंतरी पालकमंत्री नरहरी झिरवाळ यांनी नुकसानग्रस्त भागातील शेती पिकाची पाहणी केली. यासोबतच आमदार रोहित पवार तसेच शिवसेनेचे युवा नेते आदित्य ठाकरे यांनी देखील वसमत तालुक्यातील माळवटा भागात नुकसानग्रस्त शेती पिकाची पाहणी केली. आता महसूल मंत्री चंद्रशेखर बावनकुळे (Chandrashekhar Bawankule) हे नुकसानग्रस्त भागाची पाहणी करण्याकरता हिंगोली जिल्ह्यात सोमवारी येणार आहेत.
