१०५ दिवसांच्या मराठी भाषा पाठ्यक्रम अभियानाची सांगता; अमराठी बांधवांनी स्वेच्छेने मराठी स्वीकारणे हीच महाराष्ट्राच्या सांस्कृतिक एकात्मतेची ताकद असल्याचे प्रतिपादन
मुंबई : महाराष्ट्रात मराठी भाषेचा प्रसार कायद्याच्या दबावातून नव्हे, तर प्रेम आणि आत्मीयतेतून व्हावा, अशी भूमिका उपमुख्यमंत्री एकनाथ शिंदे यांनी मांडली. मराठी ही सक्तीची भाषा नसून भक्तीची भाषा आहे. अमराठी नागरिकांनी स्वेच्छेने मराठी आत्मसात करणे ही महाराष्ट्राच्या सांस्कृतिक एकतेची मोठी ताकद असल्याचे त्यांनी सांगितले.
महाराष्ट्र शासनाचा परिवहन विभाग, राज्य मराठी विकास संस्था, मुंबई मराठी साहित्य संघ आणि कोकण मराठी साहित्य परिषद यांच्या संयुक्त विद्यमाने राबविण्यात आलेल्या **‘हिंदुहृदयसम्राट बाळासाहेब ठाकरे मराठी भाषा पाठ्यक्रम अभियान’**च्या सांगता समारंभात शिंदे बोलत होते.
हा या अभियानाचा समारोप नसून मराठी अभिमानाची धडाकेबाज सुरुवात आहे. “महाराष्ट्र माझा, मराठी माझी संवादभाषा” हा महाराष्ट्राचा जयघोष असून, मराठीची भक्ती महाराष्ट्राला जोडणारी शक्ती आहे. सलग १०५ दिवस चाललेल्या या अभियानातून १.२५ लाख रिक्षा-टॅक्सी चालकांनी मराठी शिकून परीक्षा उत्तीर्ण… https://t.co/uBGx4txEFZ pic.twitter.com/KWat0ARsmi
— Eknath Shinde - एकनाथ शिंदे (@mieknathshinde) August 17, 2026
या अभियानाला १०५ दिवसांचा कालावधी लाभला. या काळात राज्यातील तब्बल १.२५ लाख रिक्षा आणि टॅक्सी चालकांनी मराठी भाषा शिकून परीक्षा उत्तीर्ण केली. या चालकांना कार्यक्रमात प्रमाणपत्रांचे वितरण करण्यात आले. या उपक्रमाचा समारोप म्हणजे मराठीच्या अभिमानाच्या नव्या पर्वाची सुरुवात असल्याचे शिंदे यांनी नमूद केले.
‘महाराष्ट्र माझा, मराठी माझी संवादभाषा’ हा संदेश महाराष्ट्राच्या भाषिक एकात्मतेचा आधार ठरावा, असे आवाहन त्यांनी केले. मराठी ही केवळ संवादाचे माध्यम नसून महाराष्ट्राची अस्मिता, स्वाभिमान आणि मायबोली असल्याचे सांगताना त्यांनी ‘लाभले आम्हास सौभाग्य, बोलतो मराठी…’ या ओळींचाही उल्लेख केला.
मराठी शिकणाऱ्या अमराठी नागरिकांना प्रोत्साहन देण्याची गरज असून, त्यांची खिल्ली उडवण्याऐवजी त्यांच्याशी मराठीत संवाद साधावा, असेही शिंदे यांनी स्पष्ट केले. भाषा कायद्याच्या भीतीने नव्हे, तर प्रेमातून शिकली जाते, असे सांगत त्यांनी परिवहन मंत्री प्रताप सरनाईक यांच्या पुढाकाराचे कौतुक केले.
हिंदुहृदयसम्राट बाळासाहेब ठाकरे यांच्या मराठी स्वाभिमानाच्या विचारांचा संदर्भ देत शिंदे यांनी आपल्या मुख्यमंत्रीपदाच्या काळातील विविध निर्णयांची माहिती दिली. मराठीला अभिजात भाषेचा दर्जा, ‘लाडकी बहीण’ योजना, मुलींच्या उच्च शिक्षणासाठी निर्णय, महिलांना एसटी प्रवासात ५० टक्के सवलत, ‘लेक लाडकी’ योजना तसेच अधिकृत नोंदींमध्ये आईचे नाव समाविष्ट करण्याचा निर्णय यांचा त्यांनी उल्लेख केला.
रिक्षा-टॅक्सी चालकांच्या कल्याणासाठी स्थापन करण्यात आलेल्या धर्मवीर आनंद दिघे महामंडळाचा निधी ५० कोटी रुपयांवरून भविष्यात १,००० कोटी रुपयांपर्यंत वाढविण्याचा संकल्पही शिंदे यांनी व्यक्त केला.
महाराष्ट्र उद्योग, स्टार्टअप, जीडीपी आणि परदेशी गुंतवणुकीच्या क्षेत्रात आघाडीवर असल्याचा दावा करत दावोसमध्ये राज्यासाठी ३ लाख कोटी आणि ४ लाख कोटी रुपयांचे सामंजस्य करार झाल्याचेही त्यांनी सांगितले.
दरम्यान, सार्वजनिक कार्यक्रमांमध्ये संसदेने मान्यता दिलेले अधिकृत ‘वंदे मातरम्’ गायले जावे, अशी सूचनाही शिंदे यांनी केली. मायबोलीबद्दलची भक्ती आणि मराठी भाषेचा सन्मान हाच महाराष्ट्राच्या सामर्थ्याचा आधार आहे, असा संदेश त्यांनी यावेळी दिला.
