रिसोड (Risod Bazar Samiti) : कृषी उत्पन्न बाजार समिती, रिसोडच्या आर्थिक उत्पन्नवाढीच्या दृष्टीने महत्त्वपूर्ण ठरलेल्या दूरदर्शन केंद्राच्या जागेच्या फेरभाडेपट्टयाला शासनस्तरावर मान्यता मिळाली आहे. मुख्य यार्डातील दूरदर्शन केंद्रासाठी पूर्वी देण्यात आलेला जागेचा करार रद्द करून तेथील ११ भूखंड २९ वर्षांच्या कालावधीसाठी नव्याने भाडेपट्ट्याने देण्याच्या निर्णयावर पणनमंत्री जयकुमार रावल यांनी २५ ऑगस्ट रोजी शिक्कामोर्तब केले. त्यामुळे बाजार समितीला मोठा आर्थिक दिलासा मिळाला आहे.
बाजार समितीने (Risod Bazar Samiti) दिलेल्या माहितीनुसार, सर्वे क्रमांक १०/२ मधील १० आणि सर्वे क्रमांक १०/६ मधील एक, असे ११ भूखंड नव्याने भाडेपट्टयाने देण्यात आले आहेत. नव्या करारानुसार प्रति चौरस फूट ३० रुपये भाडे आणि भूखंडानुसार दीड ते दोन लाख रुपये अनामत रक्कम निश्चित करण्यात आली. आतापर्यंत ५ लाख १७ हजार ७७० रुपये भाडे आणि १९ लाख २४ हजार रुपये अनामत, अशी २४ लाख ४१ हजार ७७० रुपयांची रक्कम बाजार समितीकडे जमा झाली आहे. संपूर्ण करार कालावधीत बाजार समितीला १ कोटी ५० लाख १५ हजार ३३० रुपये भाडे आणि १९ लाख २४ हजार रुपये अनामत, अशी एकूण १ कोटी ६९ लाख ३९ हजार ३३० रुपये रक्कम प्राप्त होणार असल्याचे बाजार समिती प्रशासनाने स्पष्ट केले.
जुन्या करारातून केवळ ६३ हजारांचे उत्पन्न मिळत होते. (Risod Bazar Samiti) बाजार समितीने २६ जून १९९५ रोजी रिसोड नगर परिषदेला ३७ बाय ४४ मीटर क्षेत्रफळाची जागा ५१ वर्षांसाठी भाडेपट्ट्याने दिली होती. या कराराची मुदत २६ जून २०४६ पर्यंत होती. या जागेचे वार्षिक भाडे केवळ ३ हजार रुपये होते. त्यामुळे उर्वरित कालावधीत बाजार समितीला केवळ ६३ हजार रुपये भाडे मिळणार होते. त्याचवेळी अनामत रक्कमही निश्चित करण्यात आलेली नव्हती. या जागेवर पूर्वी दूरदर्शन केंद्र सुरू करण्यात आले होते. मात्र, अनेक वर्षांपासून दूरदर्शन केंद्र बंद असल्याने जागा वापराविना पडून होती. त्यामुळे बाजार समितीने आपल्या उत्पन्नात वाढ करण्याच्या दृष्टीने जुन्या कराराचा फेरविचार करण्याचा निर्णय घेतला.
बाजार समितीने (Risod Bazar Samiti) यापूर्वी ही जागा नगरपरिषदेला भाडेतत्त्वावर दिली होती. मात्र, त्यातून वर्षाला केवळ तीन हजार रुपयांचे उत्पन्न मिळत होते. आता नगरपरिषदेकडून जागा पुन्हा हस्तांतरित करून शेतकऱ्यांच्या मुलांना व्यवसायासाठी उपलब्ध करून देण्यात आली आहे. या निर्णयामुळे बाजार समितीच्या उत्पन्नात तब्बल एक कोटी ५९ लाख रुपयांची वाढ होणार असून, त्यासोबतच शेतकरी कुटुंबातील तरुणांना व्यवसायाची संधीही मिळणार आहे.
- विष्णुपंत भुतेकर, सभापती, कृषी उत्पन्न बाजार समिती, रिसोड
वाढीव उत्पन्नाचा वापर पायाभूत सुविधांसाठी (Risod Bazar Samiti) बाजार समितीच्या उपलब्ध मालमत्तेचा योग्य व परिणामकारक वापर करून समितीचे उत्पन्न वाढविण्याच्या अनुषंगाने संचालक मंडळाने घेतलेल्या निर्णयाला शासनस्तरावरून मिळालेली मंजुरी महत्त्वपूर्ण मानली जात आहे. वाढीव उत्पन्नाचा उपयोग बाजार समितीच्या पायाभूत सुविधा तसेच शेतकरी व व्यापारी हिताच्या विविध विकासकामांसाठी करता येणार असल्याचा मनोदय बाजार समितीचे सचिव विजय देशमुख यांनी व्यक्त केला.
