कॅनबेरा (Australia Susan Coyle) : ऑस्ट्रेलियाने लेफ्टनंट जनरल सुजैन कॉयल (Susan Coyle) यांची नवीन लष्करप्रमुख म्हणून नियुक्ती करून एक ऐतिहासिक पाऊल उचलले आहे. हा निर्णय केवळ एक नियुक्ती नसून, लैंगिक भेदभावाचे अडथळे तोडण्याच्या दिशेने एक मोठे पाऊल मानले जात आहे. आजच्या जगात, जेव्हा युद्धाची पद्धत झपाट्याने बदलत आहे. तेव्हा महिला त्यात अधिकाधिक सहभागी होत आहेत. शिवाय, सुजैन कॉयल (Susan Coyle) यांची नियुक्ती ही लष्करप्रमुखासारख्या महत्त्वाच्या पदांसाठी महिलांना अयोग्य मानणाऱ्या पुराणमतवादींना दिलेले एक सडेतोड उत्तर आहे.
एका सैनिकापासून ते सर्वोच्च पदापर्यंतचा प्रवास
सुजैन कॉयल (Susan Coyle) यांनी 1987 मध्ये आर्मी रिझर्व्हमध्ये सैनिक म्हणून आपल्या कारकिर्दीला सुरुवात केली. त्यांनी ऑस्ट्रेलियन डिफेन्स फोर्स अकादमीमधून विज्ञान शाखेची पदवी मिळवली आणि 1992 मध्ये डंट्रून येथील रॉयल मिलिटरी कॉलेजमधून पदवीधर झाल्या. जनरल सायमन स्टुअर्ट यांच्या निवृत्तीनंतर, त्या ऑस्ट्रेलियन लष्कराचे नेतृत्व करणाऱ्या पहिल्या महिला ठरतील. संरक्षण मंत्री रिचर्ड मार्ल्स (Richard Marles) यांनी या नियुक्तीचे वर्णन एक ऐतिहासिक क्षण असे केले आहे.
Lieutenant General Susan Coyle, Chief of Joint Capabilities, Australian Defence Force, called on #GeneralUpendraDwivedi, #COAS and held discussions on strengthening #DefenceCooperation and enhancing joint capabilities between the two armies.
— ADG PI - INDIAN ARMY (@adgpi) March 6, 2026
The interaction focused on deepening… pic.twitter.com/pFMjXi4LOU
जगातील सर्वोच्च महिला लष्करी अधिकाऱ्यांमध्ये सामील
सुजैन कॉयल (Susan Coyle) आता जगभरात सर्वोच्च लष्करी पदे भूषवलेल्या निवडक महिला अधिकाऱ्यांच्या गटात सामील झाल्या आहेत. यामध्ये जेनी कॅरिग्नन (जुलै 2024, कॅनडाच्या पहिल्या महिला चीफ ऑफ द डिफेन्स स्टाफ), अलेन्का एर्मेन्क (नोव्हेंबर 2018, स्लोव्हेनियन लष्कराच्या पहिल्या महिला प्रमुख) आणि शेरॉन नेस्मिथ (जून 2024, ब्रिटिश इतिहासातील सर्वोच्च पदावरील महिला अधिकारी यांसारख्या नावांचा समावेश आहे.
सुझॅन यांची विशेष कौशल्ये
लेफ्टनंट जनरल सुजैन कॉयल (Susan Coyle) जुलै 2024 पासून चीफ ऑफ जॉइंट कॅपॅबिलिटीज म्हणून कार्यरत आहेत. या भूमिकेत, त्या ऑस्ट्रेलियन संरक्षण दलाच्या अवकाश, सायबर डोमेन आणि राष्ट्रीय संरक्षण समर्थनाचे नेतृत्व करतात. त्यांच्या पूर्वीच्या जबाबदाऱ्यांमध्ये हेड ऑफ इन्फॉर्मेशन वॉरफेअर; कमांडर ऑफ फोर्सेस कमांड; जॉइंट टास्क फोर्स 633; आणि 6 वी ब्रिगेड यांसारख्या महत्त्वाच्या पदांचा समावेश आहे.
आंतरराष्ट्रीय मोहिमांमध्ये व्यापक अनुभव
सुजैन कॉयल (Susan Coyle) यांना आंतरराष्ट्रीय मोहिमांमध्येही व्यापक अनुभव आहे. त्यांनी तिमोर लेस्ते, सोलोमन बेटे, अफगाणिस्तान आणि पश्चिम आशिया यांसारख्या संवेदनशील भागांमध्ये सेवा बजावली आहे. या अनुभवामुळे त्या एक कणखर आणि आधुनिक लष्करी नेत्या बनल्या आहेत, ज्या बदलत्या जागतिक सुरक्षा आव्हानांमध्ये पारंगत आहेत.
ऑस्ट्रेलियाचे नौदल प्रमुख मार्क हॅमंड (Mark Hammond) , जे एक अनुभवी पाणबुडी सैनिक आणि 2021 च्या ऑकस (AUKUS) करारातील एक प्रमुख व्यक्ती आहेत, आता देशाच्या सशस्त्र दलांचे नेतृत्व करतील. माजी पाणबुडी कमांडर मॅथ्यू बकले त्यांची जागा नौदल प्रमुख म्हणून घेतील. संरक्षण तज्ञांच्या मते, हे बदल पाणबुडीची क्षमता आणि आधुनिक तंत्रज्ञानावर आधारित युद्धतंत्र मजबूत करण्याच्या उद्देशाने केले गेले आहेत.
