वडनगर, गुजरात : पंतप्रधान नरेंद्र मोदी यांच्या ७६व्या वाढदिवसानिमित्त गुजरातमधील वडनगर येथे ‘सेवा संकल्प अभियान’अंतर्गत कार्यक्रमाचे आयोजन करण्यात आले. मोदींचे जन्मस्थान असलेल्या वडनगरमध्ये झालेल्या या कार्यक्रमाला केंद्रीय गृहमंत्री अमित शाह, गुजरातचे मुख्यमंत्री भूपेंद्र पटेल आणि महाराष्ट्राचे उपमुख्यमंत्री एकनाथ शिंदे यांच्यासह प्रमुख नेते उपस्थित होते. पंतप्रधान मोदींच्या वाढदिवसानिमित्त १७ सप्टेंबरपासून महिनाभर ‘सेवा संकल्प अभियान’ राबवले जात असल्याची माहितीही समोर आली आहे.
या कार्यक्रमात एकनाथ शिंदे यांनी आपल्या भाषणाची सुरुवात गुजराती भाषेत केली. “वडनगरनी धरतीना सपूत, देश अने दुनियाना लाडला बनी गया छे. आज आ धरती ऊपर आवीने गर्व अनुभवूं छूं,” असे म्हणत त्यांनी वडनगरच्या भूमीबद्दल भावना व्यक्त केल्या. यानंतर महाराष्ट्राच्या वतीने, राज्यातील साडेबारा कोटी जनतेच्या तसेच शिवसेनेच्या वतीने त्यांनी नरेंद्र मोदी यांना वाढदिवसाच्या शुभेच्छा दिल्या.
‘२५ वर्षांचा सार्वजनिक सेवेचा प्रवास’
एकनाथ शिंदे यांनी सांगितले की, एनडीएच्या बैठकीत केंद्रीय गृहमंत्री अमित शाह यांनी मोदींच्या वाढदिवसाच्या कार्यक्रमाबाबत भूमिका मांडली होती. गुजरातचे मुख्यमंत्री आणि त्यानंतर देशाचे पंतप्रधान म्हणून नरेंद्र मोदी यांचा सुमारे २५ वर्षांचा सार्वजनिक सेवेचा प्रवास ही महत्त्वाची बाब असल्याचे त्यांनी नमूद केले.
हा प्रवास देशासाठी अभिमानाचा विषय असल्याचे सांगत शिंदे यांनी सरकारी योजनांचा लाभ प्रत्येक गरजू आणि गरीब नागरिकापर्यंत पोहोचवण्यावर भर दिला. याच उद्देशाने ‘सेवा संकल्प अभियान’च्या माध्यमातून विविध उपक्रम राबवले जात असल्याचे त्यांनी सांगितले.
Vadnagar, Gujarat: On the occasion of Prime Minister Narendra Modi’s birthday, Maharashtra Deputy Chief Minister Eknath Shinde says, "Today is a very happy occasion as I have got the opportunity to visit this sacred and inspiring land of Vadnagar. I bow to this holy land and pay… pic.twitter.com/u7EWZeDUg0
— IANS (@ians_india) September 17, 2026
‘वय नव्हे, कर्तृत्वाची उंची महत्त्वाची’
नरेंद्र मोदी यांच्या कार्याचा उल्लेख करताना एकनाथ शिंदे म्हणाले की, त्यांच्या बाबतीत केवळ वयाचा आकडा पाहण्याऐवजी त्यांच्या कर्तृत्वाची उंची मोजली पाहिजे. मोदींच्या कार्याची तुलना हिमालयाच्या उंचीशी, तर जनतेप्रती असलेल्या त्यांच्या कामाची खोली अरबी समुद्राशी केली जाऊ शकते, असे ते म्हणाले.
वडनगरच्या भूमीतून सुरू झालेला एका बालकाचा प्रवास आज गुजरात आणि भारताच्या पलीकडे जगभर पोहोचला असल्याचे शिंदे यांनी नमूद केले. त्यांच्या मते, वडनगर ते वाराणसी ही सेवा यात्रा केवळ भौगोलिक प्रवास नसून सेवेतून समर्पण, संकल्प आणि परिवर्तनाच्या दिशेने जाणारा प्रवास आहे. त्यातून ‘विकसित भारत’च्या उद्दिष्टाकडे वाटचाल करण्याचा संदेश दिला जात असल्याचे त्यांनी सांगितले. वडनगर आणि वाराणसीला जोडणाऱ्या सेवा यात्रांचे आयोजनही यंदाच्या कार्यक्रमाचा भाग आहे.
शिंदे यांनी पुढे सांगितले की, मागील २५ वर्षांत नरेंद्र मोदी यांच्या पदांमध्ये आणि जबाबदाऱ्यांमध्ये बदल झाला; मात्र जनसेवेचा संकल्प कायम राहिला, असे त्यांनी आपल्या भाषणात म्हटले.
सरकारी योजनांचा उल्लेख करत शिंदेंचा दावा
देशाचा पंतप्रधान बदलल्यानंतर केवळ सरकारमध्ये बदल होत नाही, तर देशाच्या भवितव्यावरही परिणाम होतो, असा मुद्दा शिंदे यांनी मांडला. २०१४ नंतर केंद्र सरकारच्या विविध योजनांमुळे सामान्य नागरिकांच्या जीवनात बदल झाल्याचा दावा त्यांनी केला.
घरात गॅसची सुविधा मिळालेली गरीब महिला, पक्के घर मिळालेले कुटुंब, पहिल्यांदा बँक खाते उघडणारी व्यक्ती आणि नळाद्वारे पाणी मिळालेले कुटुंब यांचा संदर्भ देत शिंदे यांनी अन्न, वस्त्र आणि निवारा यांसारख्या मूलभूत गरजांशी संबंधित सरकारी योजनांचा उल्लेख केला. त्यांच्या मते, जनतेपर्यंत मूलभूत सुविधा पोहोचवणे हाच जनसेवेचा अर्थ आहे.
भारत चौथ्या क्रमांकावर आल्याचा दावा
नरेंद्र मोदी यांच्या कार्यकाळात भारताची प्रगती होत असून देश नव्या उंचीवर पोहोचत असल्याचे शिंदे यांनी आपल्या भाषणात म्हटले. अनेक देशांच्या अर्थव्यवस्थांवर दबाव असताना भारत दहाव्या क्रमांकावरून चौथ्या क्रमांकावर पोहोचला असून तिसऱ्या क्रमांकावर जाण्याचा संकल्प असल्याचे त्यांनी नमूद केले.
‘मेक इन इंडिया’, ‘स्टार्टअप इंडिया’ आणि ‘आत्मनिर्भर भारत’ यांसारख्या अभियानांचा वेगाने विस्तार होत असल्याचा उल्लेखही त्यांनी केला.
कलम ३७० आणि राष्ट्रीय सुरक्षेचा उल्लेख
जम्मू-काश्मीरमधील कलम ३७० हटवण्याच्या निर्णयाचाही एकनाथ शिंदे यांनी आपल्या भाषणात उल्लेख केला. नरेंद्र मोदी यांच्या नेतृत्वाखाली आणि अमित शाह यांच्या मार्गदर्शनाखाली हा निर्णय घेण्यात आल्याचे त्यांनी सांगितले.
राष्ट्रीय सुरक्षेचा मुद्दा मांडताना भारताकडे शत्रूविरोधात कठोर कारवाई करण्याची क्षमता असल्याचे शिंदे यांनी नमूद केले. भारतीय सैन्य आणि केंद्र सरकारच्या भूमिकेचा संदर्भ देत त्यांनी याला ‘नवा भारत’ असे संबोधले.
