शिक्षणविशेष
NEET UG 2026 परीक्षेभोवती मोठा वाद निर्माण झाला असून, पेपरफुटीच्या संशयाने देशभरातील विद्यार्थ्यांमध्ये चिंता वाढली आहे. राजस्थान पोलिसांच्या Rajasthan Police Special Operations Group (एसओजी) तपासात धक्कादायक माहिती समोर आली आहे.
तपासानुसार, ३ मे २०२६ रोजी झालेल्या नीट (यूजी) परीक्षेच्या दोन दिवस आधी म्हणजे १ मे रोजी सीकरमध्ये एक हस्तलिखित ‘गेस पेपर’ मोठ्या प्रमाणावर व्हायरल झाला होता. या गेस पेपरमध्ये सुमारे ३०० प्रश्न होते. त्यापैकी तब्बल १४० प्रश्न प्रत्यक्ष परीक्षेत विचारण्यात आल्याचा दावा तपास यंत्रणांनी केला आहे.
६०० गुणांचा थेट फायदा?
नीट परीक्षेत प्रत्येक बरोबर उत्तराला ४ गुण मिळतात. त्यामुळे १४० प्रश्न जुळल्यास विद्यार्थ्यांना सुमारे ५६० ते ६०० गुणांपर्यंत थेट फायदा मिळू शकतो. विशेष म्हणजे, केवळ प्रश्नच नव्हे तर पर्यायांचा क्रमही मूळ प्रश्नपत्रिकेसारखाच असल्याचे तपासात समोर आले आहे.
केरळ ते राजस्थान; तपासाची साखळी
एसओजीच्या तपासात या प्रकरणाचे धागेदोरे केरळमधील एका वैद्यकीय महाविद्यालयात शिक्षण घेणाऱ्या आणि मूळ राजस्थानातील चुरू जिल्ह्यातील विद्यार्थ्यापर्यंत पोहोचले आहेत. संबंधित विद्यार्थ्याने १ मे रोजी हा पेपर सीकरमधील एका मित्राला पाठवल्याचा संशय व्यक्त केला जात आहे.
यानंतर हा पेपर कोचिंग नेटवर्क, पीजी प्रशासक आणि करिअर समुपदेशकांच्या माध्यमातून हजारो विद्यार्थ्यांपर्यंत पोहोचल्याचे तपासात समोर आले आहे.
लाखोंमध्ये झाली कथित विक्री
प्राथमिक माहितीनुसार, सुरुवातीला हा ‘गेस पेपर’ २० हजार ते २ लाख रुपयांपर्यंत विकला जात होता. परीक्षेच्या आदल्या रात्री त्याची किंमत सुमारे ३० हजार रुपयांपर्यंत वाढल्याची माहिती समोर आली आहे.
विद्यार्थ्यांमध्ये संताप, चौकशी तीव्र
या प्रकरणामुळे देशभरातील नीट विद्यार्थ्यांमध्ये संतापाची लाट उसळली आहे. अनेक विद्यार्थ्यांनी परीक्षेच्या पारदर्शकतेवर प्रश्नचिन्ह उपस्थित केले आहे. दरम्यान, राजस्थान एसओजीकडून तपास अधिक तीव्र करण्यात आला असून, डिजिटल पुरावे आणि मोबाईल चॅट्सची तपासणी सुरू आहे.
परीक्षा व्यवस्थेतील सुरक्षेवर पुन्हा एकदा गंभीर प्रश्न उपस्थित झाले असून, या प्रकरणात आणखी मोठे खुलासे होण्याची शक्यता व्यक्त केली जात आहे.
