6E2102 विमान उड्डाणानंतर पुन्हा गोव्यात परतले; मनोहर विमानतळावर सुरक्षित लँडिंग
गोव्याहून नवी दिल्लीला जाणाऱ्या इंडिगोच्या विमानात उड्डाणानंतर तांत्रिक बिघाड आढळल्याने विमान पुन्हा गोव्याकडे वळवण्यात आले. इंजिनमध्ये समस्या निर्माण झाल्यानंतर 6E2102 या विमानाचे मनोहर आंतरराष्ट्रीय विमानतळावर सुरक्षितपणे इमर्जन्सी लँडिंग करण्यात आले. मंगळवारी सकाळी घडलेल्या या घटनेमुळे काही काळ विमानतळावर सतर्कतेचे वातावरण निर्माण झाले.
उड्डाणानंतर इंजिनमध्ये बिघाड
6E2102 क्रमांकाचे विमान नियोजित वेळेपेक्षा पाच मिनिटे उशिराने सकाळी 9:15 वाजता गोव्याहून दिल्लीच्या दिशेने रवाना झाले होते. उड्डाण केल्यानंतर काही वेळातच इंजिनमध्ये तांत्रिक समस्या असल्याचे लक्षात आले. परिस्थितीची माहिती मिळताच वैमानिकांनी विमान परत गोव्याकडे वळवले.
विमानाचे दिल्लीमध्ये सकाळी 11:45 वाजता लँडिंग होणे अपेक्षित होते. मात्र, इंजिनमधील बिघाडामुळे ते मनोहर आंतरराष्ट्रीय विमानतळावर सुरक्षितपणे उतरवण्यात आले. सूत्रांच्या माहितीनुसार, या काळात काही वेळासाठी ‘फुल इमर्जन्सी’ जाहीर करण्यात आली होती.
इंडिगोचे अधिकृत निवेदन
इंडिगोने या घटनेबाबत अधिकृत निवेदन जारी केले आहे. कंपनीच्या म्हणण्यानुसार, उड्डाणानंतर काही वेळात इंजिनमध्ये तांत्रिक समस्या निदर्शनास आली. त्यानंतर स्टँडर्ड ऑपरेटिंग प्रोसिजर (SOP) नुसार संबंधित अधिकाऱ्यांना माहिती देण्यात आली आणि वैमानिकांनी विमान गोव्याकडे परत आणले.
मनोहर आंतरराष्ट्रीय विमानतळावर विमान सुरक्षितपणे उतरवल्यानंतर त्याची देखभाल आणि तांत्रिक तपासणी सुरू करण्यात आली आहे. प्रवाशांची गैरसोय कमी करण्यासाठी त्यांना नाश्ता देण्यात आला तसेच परिस्थितीबाबत वेळोवेळी माहिती देण्यात आली. प्रवाशांसाठी पर्यायी व्यवस्था उपलब्ध करून देण्याचे काम सुरू असल्याचेही इंडिगोने सांगितले. प्रवासी, कर्मचारी आणि विमानांची सुरक्षा ही कंपनीची सर्वोच्च प्राथमिकता असल्याचे इंडिगोने स्पष्ट केले.
दम्मम-दिल्ली विमानाला बॉम्बची धमकी
दरम्यान, दम्ममहून दिल्लीला येणाऱ्या एअर इंडिया एक्सप्रेसच्या विमानालाही सोमवारी हवेत असतानाच बॉम्बची धमकी मिळाली होती. एका केबिन क्रू सदस्याला विमानातील प्रसाधनगृहात टिश्यू पेपरवर ‘BOMB’ असे लिहिल्याचे आढळले.
यानंतर विमानाचे अहमदाबादमधील सरदार वल्लभभाई पटेल आंतरराष्ट्रीय विमानतळावर इमर्जन्सी लँडिंग करण्यात आले. सुरक्षेच्या कारणास्तव विमान निर्जन ठिकाणी नेऊन तपासणी करण्यात आली. विमानातील सर्व 32 प्रवाशांना सुरक्षितपणे बाहेर काढण्यात आले आणि त्यानंतर विमान टर्मिनल-2 येथे हलवण्यात आले. या घटनेत कोणालाही दुखापत झाली नाही.
