नवी मुंबईहून आलेले विमान पार्किंगदरम्यान VDGS खांबाला धडकले; आदल्या दिवशी पायलट आजारी पडल्याने इंडिगोचे दोहा-बेंगळुरू विमान मस्कतकडे वळवले होते
इंडिगोच्या विमानांशी संबंधित दोन घटना सलग दोन दिवस समोर आल्या आहेत. शुक्रवारी सकाळी जम्मू-काश्मीरमधील श्रीनगर विमानतळावर प्रवाशांनी भरलेले इंडिगोचे विमान पार्किंग करताना VDGS खांबाला धडकले. सुदैवाने या घटनेत विमानातील कोणत्याही प्रवाशाला किंवा क्रू सदस्याला दुखापत झाली नाही. घटनेनंतरही श्रीनगर विमानतळावरील विमान वाहतूक सुरळीत सुरू राहिली.
पार्किंगदरम्यान विमानाची खांबाला धडक
मिळालेल्या माहितीनुसार, नवी मुंबईहून श्रीनगरला पोहोचलेले इंडिगोचे विमान पार्किंगच्या क्रमांक 6 वर नेले जात होते. त्याचवेळी विमानाची VDGS यंत्रणेच्या खांबाला धडक झाली. सकाळी सुमारे 9 वाजून 2 मिनिटांनी ही घटना घडल्याचे विमानतळावरील अधिकाऱ्यांनी सांगितले.
घटनेच्या वेळी विमानात मोठ्या संख्येने प्रवासी होते. मात्र, धडकेनंतरही कोणत्याही प्रवाशाला किंवा क्रू मेंबरला दुखापत झाली नाही. विमानातील सर्व प्रवासी आणि कर्मचारी सुरक्षित असल्याचे विमानतळ प्रशासनाने स्पष्ट केले आहे.
Srinagar, J&K | According to Srinagar airport authorities, an IndiGo flight 6E 225 (VT-NOG) operating from Navi Mumbai to Srinagar came into contact with the VDGS pole during the parking process at Srinagar Airport at approximately 0902 hours today.
— ANI (@ANI) September 4, 2026
All passengers and crew… pic.twitter.com/jdusSr6el5
नेमकी चूक कुठे झाली? तपास सुरू
विमान पार्क करताना ही धडक नेमकी कशामुळे झाली, याचा तपास सुरू करण्यात आला आहे. विमानतळ प्रशासनाकडून घटनेची चौकशी केली जात असून, तपास पूर्ण झाल्यानंतरच अपघातामागील अचूक कारण समोर येणार आहे.
त्यामुळे सध्या या घटनेमागे कोणतीही विशिष्ट चूक किंवा कारण असल्याचा निष्कर्ष काढणे योग्य ठरणार नसल्याचे अधिकाऱ्यांनी स्पष्ट केले आहे.
आदल्या दिवशी दोहा-बेंगळुरू विमान मस्कतकडे वळवले
दरम्यान, या घटनेच्या एक दिवस आधी गुरुवारी इंडिगोच्या आणखी एका विमानाला आपत्कालीन परिस्थितीचा सामना करावा लागला होता. दोहा येथून बेंगळुरूकडे रवाना झालेले इंडिगोचे 6E 1302 हे विमान पायलट आजारी पडल्याने मस्कतच्या दिशेने वळवण्यात आले.
हे विमान ए321 प्रकारातील होते. अचानक वैद्यकीय मदतीची आवश्यकता निर्माण झाल्यामुळे विमान मस्कत येथे उतरवण्यात आल्याचे इंडिगोकडून सांगण्यात आले. विमान उतरल्यानंतर संबंधित सदस्याला वैद्यकीय पथकाने उपचार दिले. त्यांची प्रकृती आता सुधारली असल्याची माहिती कंपनीने दिली.
प्रवाशांचा पुढील प्रवास सुरळीत करण्यासाठी इंडिगोने पर्यायी विमान आणि नवीन क्रूची व्यवस्था केली. त्यानंतर प्रवाशांना बेंगळुरूला पोहोचवण्यात आले.
