पालम पोलिस ठाण्यात गुन्ह्याची नोंद उपविभागीय पोलीस अधिकार्‍यांकडे तपास...!
परभणी (Female Employees Atrocities) : पालम तालुक्यातील शासकिय महिला कर्मचार्‍यावर वारंवार अत्याचार करून जीवे मारण्याची धमकी दिल्याची घटना २४ एप्रिल रोजी घडली होती. या प्रकरणी महिलेच्या तक्रारीवरून तिघां विरोधात २१ जुलै रोजी गुन्हा दाखल करण्यात आला आहे.
पोलिसांनी दिलेल्या माहितीनुसार, फिर्यादी महिला अनुसूचित जातीतील असून शासकिय सेवेत कार्यरत आहे. महिलेच्या तक्रारीनुसार मुख्य आरोपी अक्षय रामराव शिंदे याने एप्रिल २०२४ ते मे २०२६ या कालावधीत तिच्या इच्छेविरुद्ध वारंवार शारीरिक संबंध ठेवले तसेच ही बाब कुणाला सांगितल्यास जीवे मारुन टाकण्याची धमकी दिली. तक्रारीत पुढे नमूद केल आहे की, अक्षय रामराव शिंदे रा.पालम वय ३१, अशिष उगले रा.उमरा ता.पालम वय २८ आणि विष्णू कराळे रा.पालम वय ३२ यांनी संगनमत करून फिर्यादीच्या संमतीशिवाय गर्भपात घडवून आणल्याचाही आरोप करण्यात आला आहे.
या प्रकरणी पालम पोलिस ठाण्यात मंगळवार २१ जुलै रोजी गुन्हा दाखल करण्यात आला आहे. या गुन्ह्याचा पुढील तपास उपविभागीय पोलिस अधिकारी परभणी, चार्ज पूर्णा नामदेव रिठे हे करत असून वृत्त लिहिपर्यंत तिन्ही आरोपींना अटक झालेली नव्हती.
