शहरातील अनुसया टॉकीज परिसरात कोतवाली पोलिसांची कारवाई दोन महिला आरोपी ताब्यात
परभणी (Parbhani ganja seized) : शहरातील अनुसया टॉकीज परिसरात गांजाची विक्री करण्यासाठी आलेल्या दोन महिलांना कोतवाली पोलिसांनी सापळा रचून ताब्यात घेतले. या कारवाईत १ लाख ६५ हजार रुपये किमतीचा ८ किलो २५० ग्रॅम गांजा जप्त करण्यात आला. गुरुवारी मध्यरात्री गंगाखेड रोडवरील अनुसया टॉकीज समोर ही कारवाई करण्यात आली. कोतवाली पोलिस ठाण्याचे सहायक पोलीस निरीक्षक व्ही. जी. कासले यांच्या फिर्यादीवरून एनडीपीएस कायद्यान्वये गुन्हा दाखल करण्यात आला आहे.
पोलिस शिपाई घनसावंत यांना दोन महिला गांजाची विक्री (Parbhani ganja seized) करण्यासाठी येणार असल्याची माहिती मिळाली होती. त्यानंतर वरिष्ठ पोलीस अधीक्षक पंकज कुमावत तसेच उपविभागीय पोलीस अधिकारी समाधान पाटील यांच्या मार्गदर्शनाखाली छापा टाकण्यात आला. पोलिसांनी अनुसया टॉकीज परिसरात सापळा रचून संशयित महिलांना अडवले. त्यांची चौकशी केली असता त्यांनी आपली नावे सीमा दस्तगीर शेख (वय ५०, रा. भीमनगर, परभणी) व रुपा माधव अंबाडे (वय ३६, रा. भीमनगर, परभणी) अशी सांगितली. सीमा शेख यांच्या हातातील लाल रंगाच्या प्रवासी बॅगेची तपासणी केली असता त्यामध्ये खाकी चिकटपट्टीने पॅक केलेले चार मोठे पुडे आढळले.
पंच व राजपत्रित अधिकार्‍यांच्या उपस्थितीत तपासणी केली असता या पुड्यांमध्ये हिरवट-काळसर रंगाचा गांजा असल्याचे निष्पन्न झाले. (Parbhani ganja seized) जप्त केलेल्या गांजाचे एकूण वजन ८ किलो २५० ग्रॅम असून त्याची किंमत १ लाख ६५ हजार रुपये असल्याचे पोलिसांनी सांगितले.या प्रकरणी दोन्ही महिलांविरुद्ध एनडीपीएस कायदा अंतर्गत विविध कलमानुसार गुन्हा दाखल करण्यात आला आहे. पुढील तपास कोतवाली पोलिस करीत आहेत. सदरची कारवाई कोतवाली पोलीस ठाण्याचे प्रभारी कासले, पो.नी मांजरमकर, सपोनी शिंगाडे, सपोउपनी साळवे, पोशी गौस, पोशी घनसावंत, पोशी चव्हाण, पोशी गुट्टे, पोह.रनखांब, मोपोशी टेहेरे, पोशी चव्हाण या कोतवाली पोलीस ठाण्याच्या पथकाने केली.
