जवाहरलाल नेहरू पोर्टमध्ये ‘पायलट’ पदांची भरती; १२ ऑक्टोबरपर्यंत अर्जाची संधी

योजना-१ आणि योजना-२ अंतर्गत करार पद्धतीने नियुक्ती; मास्टर कॉम्पिटन्सी प्रमाणपत्र आणि संबंधित अनुभव आवश्यक

जवाहरलाल नेहरू पोर्ट ऑथॉरिटी (JNPA) च्या सागरी विभागात ‘पायलट’ पदासाठी भरती प्रक्रिया जाहीर करण्यात आली आहे. योजना-१ आणि योजना-२ या दोन्ही श्रेणींतर्गत कराराच्या आधारावर ही नियुक्ती केली जाणार आहे. पात्र उमेदवारांना विहित नमुन्यात अर्ज सादर करण्याची संधी असून, अर्ज करण्याची अंतिम तारीख १२ ऑक्टोबर २०२६ आहे.

या पदासाठी पात्र ठरण्यासाठी उमेदवार भारतीय नागरिक असणे आवश्यक आहे. तसेच फॉरेन गोइंग जहाजांवर चीफ ऑफिसर किंवा त्यापेक्षा वरिष्ठ पदावर किमान एक वर्षाचा अनुभव असलेले मास्टर कॉम्पिटन्सी प्रमाणपत्र उमेदवाराकडे असणे बंधनकारक आहे. भारतीय नागरिकाकडे परदेशी कॉम्पिटन्सी प्रमाणपत्र असल्यास त्याला डीजी शिपिंगची संबंधित मान्यता असणे आवश्यक आहे.

पायलट सेवेत प्रवेशाच्या वेळी उमेदवाराचे वय ५५ वर्षांपेक्षा अधिक नसावे. शासकीय किंवा निमशासकीय संस्थेत कार्यरत असलेल्या उमेदवारांना त्यांच्या संबंधित संस्थेच्या योग्य माध्यमातून अर्ज करावा लागणार आहे.

अर्ज कसा करायचा?

इच्छुक उमेदवारांनी शैक्षणिक पात्रता, कॉम्पिटन्सी प्रमाणपत्र, सीडीसी, जात प्रमाणपत्र यांसह आवश्यक कागदपत्रे जोडून अर्ज सादर करायचा आहे. अर्ज स्पीड पोस्ट किंवा रजिस्टर्ड पोस्टने पाठवता येईल. तसेच harbourmaster@jnport.gov.in या ई-मेल पत्त्यावरही अर्ज पाठवण्याची सुविधा देण्यात आली आहे.

अर्जासोबत जातीच्या दाखल्यासह आवश्यक प्रमाणपत्रांच्या साक्षांकित प्रती जोडणे अनिवार्य आहे.

मुलाखत कुठे होणार?

निवड प्रक्रियेसाठी मुलाखतीचे वेळापत्रक उमेदवारांना ७ दिवस आधी कळवण्यात येणार आहे. मुलाखत प्रत्यक्ष किंवा ऑनलाइन अशा दोन्ही पद्धतींनी घेण्यात येऊ शकते. मुलाखतीचे ठिकाण डेप्युटी कन्झर्व्हेटर कार्यालय, जवाहरलाल नेहरू पोर्ट ऑथॉरिटी, प्रशासन इमारत, नवी शेवा, नवी मुंबई असे आहे.

किती मिळणार मानधन?

योजना-१ आणि योजना-२ अंतर्गत निवड झालेल्या उमेदवारांना त्यांच्या टनेज स्लॅबनुसार वेतन आणि विविध भत्ते देण्यात येणार आहेत. सुरुवातीच्या टप्प्यात निवड झालेल्या उमेदवारांना प्रशिक्षणार्थी म्हणून नियुक्त केले जाईल.

भरतीची सविस्तर जाहिरात, अर्जाचा नमुना, पात्रता, अटी आणि इतर आवश्यक माहिती JNPAच्या अधिकृत संकेतस्थळावर उपलब्ध करून देण्यात आली आहे. त्यामुळे अर्ज करण्यापूर्वी उमेदवारांनी अधिकृत अधिसूचना काळजीपूर्वक तपासणे आवश्यक आहे.