शिकाऱ्यांकडून राज्य प्राणी शेकरू सह उडती खारुताई जप्त
गडचिरोली (Wild Life Protection) : संपूर्ण राज्यात 'ग्लोरी ऑफ फॉरेस्ट' म्हणून प्रसिद्ध असलेल्या अल्लापल्ली च्या जंगलात पशु पक्षांसह वन्य प्राण्यांची शिकार करणारी 12 जणांची टोळी वन विभागाच्या जाळ्यात अडकली असून या टोळीकडून राज्य प्राणी शेकरू, उडणारी खार, रॉबिन पक्षी जप्त करण्यात आले आहेत.
अलापल्ली वनपरिक्षेत्रातील अलापल्ली उपक्षेत्र, नेंडेर नियत क्षेत्र खंड क्र. १० मध्ये ही घटना उघडकीस आली. वनपरिक्षेत्र अधिकारी गौरव गणवीर यांचे पथक गस्त घालत असतांना या टोळीचा पर्दाफास झाला. त्यांच्याकडून ४ शेकरू, १ उडणारी खार, १ रॉबिन, १ हरियाल, ५ मोटारसायकल, मोबाईल तसेच शिकारी साहित्य जप्त करण्यात आले आहे.
सर्व आरोपी एटापल्ली तालुक्यातील उडेरा गावचे असल्याची माहिती समोर आली आहे. पुढील तपास आलापल्ली वन विभागातर्फे करण्यात येत असून अद्याप पर्यंत आरोपींची नावे कळू शकली नाही .
