नागपूर, अमरावती, गडचिरोली आणि गोंदियाला येलो अलर्ट; जळगावात २०-२५ दिवसांपासून पावसाची दडी
राज्यातील अनेक भागांमध्ये पावसाने ओढ दिल्याने खरीप हंगामातील पिकांवर संकट निर्माण झाले आहे. पावसाळ्याचे जवळपास तीन महिने उलटूनही अपेक्षित पर्जन्यमान न झाल्याने शेतकरी चिंतेत आहेत. त्यातच नागपूर वेधशाळेच्या नव्या अंदाजामुळे जोरदार पावसाची प्रतीक्षा करणाऱ्या शेतकऱ्यांची निराशा वाढण्याची शक्यता आहे. मध्यप्रदेशवर तयार झालेला कमी दाबाचा पट्टा उत्तरेकडे सरकल्याने अमरावती आणि गोंदिया जिल्ह्यांसाठीचा ऑरेंज अलर्ट मागे घेत येलो अलर्ट जारी करण्यात आला आहे.
नव्या हवामान अंदाजानुसार विदर्भातील नागपूर, अमरावती, गडचिरोली आणि गोंदिया या जिल्ह्यांना येलो अलर्ट देण्यात आला आहे. त्यामुळे या भागांमध्ये हलक्या स्वरूपाच्या पावसाची शक्यता आहे. सध्या विदर्भात बहुतांश ठिकाणी ढगाळ वातावरण असून काही भागांत अत्यंत कमी प्रमाणात पाऊस पडत आहे. नागपूर वेधशाळेचे वैज्ञानिक प्रवीण कुमार यांनी ही माहिती दिली आहे. मात्र, सध्याच्या परिस्थितीत शेतकऱ्यांना अपेक्षित असलेला मुसळधार पाऊस अद्याप झालेला नाही.
पावसाचा अभाव केवळ पिकांपुरता मर्यादित राहिलेला नसून अनेक भागांत पिण्याच्या पाण्याची टंचाई जाणवू लागली आहे. त्याचबरोबर जनावरांच्या चाऱ्याचाही प्रश्न निर्माण झाला आहे. मागील वर्षी अतिवृष्टी आणि महापुराचा सामना केल्यानंतर यंदा पावसाने पाठ फिरवल्याने शेतकऱ्यांसमोरील अडचणी वाढल्या आहेत. उभी पिके वाया जाण्याची भीती शेतकऱ्यांना सतावत आहे.
जळगावात पिकांवर पावसाअभावी संकट
जळगाव जिल्ह्यात गेल्या २० ते २५ दिवसांपासून पावसाने विश्रांती घेतल्याने शेकडो हेक्टर क्षेत्रातील खरीप पिके धोक्यात आली आहेत. यंदा एल निनोच्या प्रभावामुळे जिल्ह्यात काही भागांत अतिवृष्टी, तर काही ठिकाणी तुरळक ते मध्यम पाऊस झाला. पुढील काळात समाधानकारक पाऊस होईल, या अपेक्षेने अनेक शेतकऱ्यांनी घाईघाईने पेरण्या पूर्ण केल्या.
मात्र पिकांची उगवण झाल्यानंतर त्यांच्या वाढीसाठी आवश्यक असलेला पाऊसच पुरेसा झालेला नाही. त्यामुळे हलक्या जमिनीवरील पिके सुकण्यास सुरुवात झाली आहे. दुसरीकडे, भारी जमिनीतील पिकांच्या वाढीवरही परिणाम झाला असून उत्पादनात मोठी घट होण्याची शक्यता व्यक्त केली जात आहे.
जिल्ह्यातील अनेक भागांत उडीद, मूग, सोयाबीन, कापूस आणि मका या पिकांवर पावसाअभावी परिणाम होत आहे. पिके कोमेजू लागल्याने शेतकऱ्यांच्या चिंतेत आणखी भर पडली आहे.
