अपघातानंतर ताब्यात घेतलेल्या शरद कदम यांना रुग्णालयात नेले नसल्याचा आरोप; अमित साटम, रोहन राठोड यांची कारवाईची मागणी
मुंबईतील वर्सोवा पोलीस ठाण्याच्या हद्दीत पोलिसांच्या कार्यपद्धतीवर प्रश्नचिन्ह निर्माण करणारा प्रकार समोर आला आहे. कार अपघातानंतर चौकशीसाठी ताब्यात घेतलेल्या 73 वर्षीय ज्येष्ठ नागरिकाची पोलीस ठाण्यात प्रकृती खालावली. त्यांना ब्रेन स्ट्रोक आल्याचा आरोप असूनही, त्यांना तातडीने रुग्णालयात दाखल न करता तब्बल पाच तास पोलीस ठाण्यातच बसवून ठेवल्याचा आरोप करण्यात आला आहे.
या प्रकरणाची गंभीर दखल मुंबई भाजप अध्यक्ष अमित साटम आणि नगरसेवक रोहन राठोड यांनी घेतली असून, संबंधित पोलिसांवर कारवाई करण्याची मागणी करत त्यांनी पोलीस उपायुक्तांकडे तक्रार दाखल केली आहे.
किरकोळ अपघातानंतर शरद कदम यांना घेतले ताब्यात
मिळालेल्या माहितीनुसार, भाजपचे माजी नगरसेवक रोहन राठोड यांचे नातेवाईक असलेले 73 वर्षीय शरद कदम हे वर्सोवा परिसरातून वॅगनआर कारने प्रवास करत होते. यावेळी त्यांच्या कारची एका महिला डॉक्टरच्या कारला किरकोळ धडक झाली.
अपघातानंतर संबंधित महिला डॉक्टरने पोलिसांना माहिती दिली. त्यानंतर वर्सोवा पोलिसांनी घटनास्थळी पोहोचून शरद कदम यांना ताब्यात घेतले. यावेळी महिला डॉक्टरने कदम यांनी मद्यप्राशन केले असल्याचा संशय व्यक्त केला होता.
पोलीस ठाण्यात प्रकृती बिघडली, उपचारासाठी विलंब झाल्याचा आरोप
चौकशी सुरू असताना शरद कदम यांची अचानक प्रकृती खालावली आणि त्यांना ब्रेन स्ट्रोक आल्याचे सांगण्यात आले. अशा परिस्थितीत तातडीने वैद्यकीय उपचार मिळणे आवश्यक असताना पोलिसांनी त्यांना रुग्णालयात न नेता पाच तास पोलीस ठाण्यातच ठेवले, असा आरोप करण्यात आला आहे.
ब्रेन स्ट्रोकच्या उपचारांमध्ये सुरुवातीचा कालावधी अत्यंत महत्त्वाचा मानला जातो. मात्र, वेळेवर वैद्यकीय मदत न मिळाल्यामुळे त्यांच्या जीवाला धोका निर्माण झाल्याचा आरोप भाजप नेत्यांनी केला आहे.
अमित साटम आणि रोहन राठोड यांची तत्काळ कारवाई
घटनेची माहिती मिळताच मुंबई भाजप अध्यक्ष अमित साटम आणि रोहन राठोड यांनी तातडीने हस्तक्षेप केला. त्यांच्या सूचनेनुसार कार्यकर्ते वर्सोवा पोलीस ठाण्यात पोहोचले आणि शरद कदम यांना उपचारासाठी विलेपार्ले येथील कूपर रुग्णालयात दाखल करण्यात आले.
पोलिसांच्या कथित निष्काळजीपणामुळे वृद्ध नागरिकाचा जीव धोक्यात आल्याचा आरोप करत भाजप नेत्यांनी संताप व्यक्त केला आहे.
वरिष्ठ अधिकाऱ्यांकडून चौकशी सुरू
या प्रकरणी अमित साटम यांनी वर्सोवा पोलीस ठाण्यातील संबंधित अधिकाऱ्यांवर कारवाई करण्याची मागणी करत पोलीस उपायुक्तांना पत्र दिले आहे.
तक्रारीनंतर वरिष्ठ पोलीस अधिकाऱ्यांच्या आदेशानुसार सहाय्यक पोलीस आयुक्त दर्जाच्या अधिकाऱ्यामार्फत या प्रकरणाची चौकशी सुरू करण्यात आली आहे. चौकशीत जे अधिकारी किंवा कर्मचारी दोषी आढळतील, त्यांच्यावर कठोर कारवाई करण्यात येईल, असे वरिष्ठ पोलिसांकडून सांगण्यात आले आहे.
